Court-in eiruk thubuaia thiam loh a chantir Mustagur Rahman kum 5 tang turin hrem
Special Judge (Prevention of Corruption Act) Dr HTC Lalrinchhana chuan nimin khan June 2, 2023-a thiam loh a chantir Mustagur Rahman, Guwahati chu kum 5 chhung jail tang turin a hrem.
Special Judge hian June 2-a thiam loh a chantir hnuah Musatgur Rahman hremna hi nimin khan a puang a, kum 5 tang tur leh cheng nuai 20 chawi turin a hrem. Cheng nuai 20 hi a pe thei lo a nih chuan kum 20 chhung jail a tan belh ang. Mustagur Rahman hi Central Jail-a tang lai mek a ni.
Tarlan tawh angin Mustagur Rahman hi MAMCO sum cheng nuai 268 eirûknaah ACB chuan December 3, 2015 khan thubuai an ziak lut a; an chhuinaah khatih laia MAMCO deputy manager Lalremthanga leh a consultant Mustagur Rahman chu inhnamhnawihah puh an ni.
ACB-ten an man hnuah bail hmangin a chhuak a, a tlanbo zui a; hun eng emaw chen zawn a nih hnuah ACB-te chuan February 24, 2023 khan Delhi-ah an man leh a ni.