Manipur aṭanga Aizawla tlanchhiat tum lirthei chesualah mi pahnih an thi

Manipur buaina avanga an sahimna zawnga Aizawla kal mi pangate chuanna lirthei chu Manipur aṭanga Saitual thlen hma km. 10 velah June 4, Pathianni zan dar 10:30 vel khan chesualin, mi pahnihin nunna an chan a, mi pathum an hliam.

Lirthei hi kawng­thlangah tlanliamin, Haoseikipgen (57) leh Lamneihkhol (23), Lamka ve vete chu chetsualna hmunah an thi.

Hliam tuarte chu Seilungmuon (thla 11) s/o Kamgenthang, Ningchingtheng (7) d/o Lunminlen leh Nengkipathem (15) s/o Lensap Haukip, Lamka vek an ni.

Naute thla 11 mi hi a ban ruh a tliak a, chetsualna hmuna thi Lamneihkhol fapa a ni. Nengkipathem (15) hi a malpui ruh a tliak a, Lamneihkhol laizawn a ni thung.

Chetsualna a thlen thu hriat a nih veleh Saitual Police, Sub.Hqrs YMA Saitual leh Saichal YMA hruaituten a hmun an pan nghal a, chhanchhuah hna an thawk.

Chetsualna hmun hi kham chhengchhe hmun niin, Sub.Hqrs YMA hnuaia Quick Respond Team leh mi tlawmngaite chuan ruang leh hliam lakchhuah hna an thawk nghal a ni.

An vai hian Saitual District Hospital Casualty panpui an nih hnuah hliam tuar zinga pahnihte hi Aizawl lamah phurhthlak an ni a, pakhat hi first aid peka chhuahtir leh a ni.

Mitthite hi Sub.Hqrs YMA Saitual committee room-ah Pathianni zan khan lumenpui an ni a, nimin zing khan postmortem an nih hnuah Manipur lama vui turin lak chhoh an ni.