Champhai district-a khua/veng parukah ASF a leng; Kum dang angin vawk thi a tam rih lo - AH&Vety

Vawk pùl hri, African Swine Fever (ASF) vangin Champhai district-a khua/veng parukah vawk 85 a thi tawh. AH&Vety department hotute chuan, kum dang angin ASF vanga vawk thi a tam tawh lo tih an sawi.

AH&Vety department hotute chuan Vanglaini palai zawhna chhangin, kuminah hian ASF vanga vawk eng emaw zat thi mah se, kum dang angin a tam rih lo tih an sawi a, "Hetiang hri hi chu a lèn tawhnaah hian a leng nawn fo ṭhin. Tunah rih chuan Champhaia a lènna ho bak chu a leng darh vak lo a, vawk pawh an thi puk puk tawh lo," an ti.

Kuminah hian ASF vangin Mizoramah vawk 85 a thi tawh a, vawk 170 suat a ni tawh. ASF vang hian kum 2021-ah vawk thi 33,417 leh vawk suat 12,568 a awm a, kum 2022 khan vawk 12,791 leh suat 11,594 a awm bawk.

Mizoramah ASF hi kum 2021 March thla khan Lunglei district-a Lungsen khuaah a leng ṭan a; March 2021 aṭanga nimin thleng khan ASF vangin vawk 46,293 a thi tawh a, AH&Vety department hriatpuinain vawk 24,332 suat a ni tawh bawk.