World Environment Day hman a ni; Lungleiah day pualin hnatlang nei

Mizoram Pollution Control Board (MPCB) chuan nimin khan Dawrpui Multipurpose Centre-ah World Environment Day (WED) 2023 an hmang a, conservator of forest (CC) Lalrammawii Sailo in hmanpuiin, NIT Mizoram leh MPCB buatsaih Waste Reduction Hackathon a hawng nghal. Kumin WED thupui chu 'Beat Plastic Pollution' tih a ni.

Lalrammawii Sailo chuan, World Environment Day chu a ṭangkai thei ang bera hman a ṭul thu a sawi a, "WED thupui atana Beat Plastic Pollution tih hi vawi hnih kan hmanna a ni ta a, hman nawn ngai tawh lo tura plastic bawlhhlawh tih tlem hi kan tum ber tawh tur a ni. Kan chhehvela cheng ramsate leh luia cheng nungchate pawhin tuarin an thih phah nasa hle a, mihringte thlengin kan hriselna a tichhia a, kan thihpui nasa tawh hle," a ti.

Energy rem chungchangah pawh hmalak thar a ngai tih sawiin khuallian chuan, "Sum leh pai renchem nan pawh kan mamawh hle a, hote anga lang tui ren te, electric ren te, ke-a kal leh ruahtui khawl ṭhatte hi a pawimawh hle. Sarang leh polythene lam vawi khat hmana kan paih nghal mai chite hi hman tawh loh tur a ni a, sorkar phal tawh loh thil a nih bakah kan khawvel tichhetu a ni," a ti a, environment humhim nan thing phun uar a pawimawh thu a sawi.

MPCB hian World Environment Day hi May thla tir aṭang khan Mission LiFE kaltlangin a hmang a - district hrang hrangah awareness campaign leh mass cleaning drive-te, photography competition, exhibition on waste to wealth competition, painting competition leh online quiz competition-te an buatsaih a; heng inelna hrang hranga tiṭhate hnenah nimin khan certificate leh pawisa sem a ni a, kalkhawmte hian environment tichhe lo tur leh humhim turin thutiam an sawirual.

World Environment Day pual hian nimin khan Lunglei khawpuia sorkar department, paramilitary force leh pawl hrang hrang buatsaihin faina hnatlang leh thingphun humhalh leh samfai hnatlang neih a ni.

Hnatlangah hian Lungleia Environment, Forest & Climate Change department-a thawkte chuan nikum Green Mizoram Day-a Mizoram Polytechnic campus-a thing ṭiak 376 an phunte awmna hmun an tifai a, a thi 30 vel an hnawhkhat nghal. Nikuma thing an phun zingah hian Tlaizawng a tam bera, Herhse leh Pangkaite an awm bawk.

Assam Rifles leh Clean Lunglei ṭangkawp chuan nimin zing khan thutiam sawirualin, thingphun leh Lunglei khawpui hmun lun lai – AOC, Sobji Bazar, Electric Veng leh Venglaite thenfai hnatlang an nei a; Project Save Tlawng chuan Centenary Lungphun, Pukpuiah nikuma an thingphunte hung ṭhat, samfai leh bawlhhlawh thenfai hnatlang an nei nghal a ni.