STI, HIV, TB & Hepatitis inkaidarhna Jail leh de-addiction centre-ah a hluar

Kolasib district bawrhsap John LT Sanga hoin nimin khan IPR conference hall-ah Integrated STI, HIV, TB & Hepatitis (ISHTH) Campaign kalpui tura mawhphurhna hrang hrang inhrilhhriatna neih a ni. Bawrhsap chuan, zirchianna ṭhenkhat aṭangin district jail leh de-addiction centre-ah heng natnate hi an inkaidarh nasa bik tih hmuhchhuah a nih thu a sawi.

John LT Sanga chuan, HIV hrik kai hmuhchhuah tamna district an nih angin a darh zel tur venna leh a kaihhnawih natna dang dap chhuah leh enkawl tura ISHTH Campaign kalpui a ni tur chu lawmawm a tih thu a sawi a, "Zirchianna ṭhenkhata a lan danin, mihring a huhoa enkawlna hmun - district jail leh de-addiction centre-ah te chuan heng hri inkaidarhna hi a hluar bik tih hmuhchhuah a ni a, heng hmunahte hian campaign neih a ni dawn," a ti.

Kolasib district chu state ṭhenawmte nen ramri inṭawm a nih vangin natna inkaichhawn theih hrang hrang veite dap chhuah leh enkawlna pe tura hmalakna chuan Mizoram ram pum hriselna thui tak a ṭha zawngin a nghawng ngei a beisei thu Bawrhsap chuan a sawi bawk.

Senoir medical officer Dr RK Lalthlamuana tarlan danin, ISHTH Campaign chhung hian Kolasib District Jail; Jordan Home, Seṭhawn; Golgotha Home, Vairengte; TNT, Khuangpuilam; Swadhar Greh, Kolasib leh Vairengtea enkawl mek mi 350 vel chu STI, HIV, TB leh hepatitis hrik an vei leh vei loh endik a ni dawn a, a ṭul dan azirin counselling leh enkawlna pek an ni ang.