EFCC Minister-in PUC-ah National Seminar a hawng

Pachhunga University College (PUC)-a Mizo department chuan nimin khan PUC Seminar Hall-ah G20 summit denchhenin 'National Seminar on Ecocriticism and Environ-mental Studies : A Mizo Perspective (Khuarel leh Thu leh Hla Inkungkaihna: Mizo Thlirna aṭangin)' an buatsaih a, Environment, Forest and Climate Change (EFCC) minister TJ Lalnun-tluanga'n a hawng.

TJ Lalnuntluanga chuan, thu leh hla leh environment humhalh chu a inkungkaih thuk hle tih a sawi a, "Thing leh mau, nungcha leh thil siam mawina leh an ṭangkainate hi thu leh hla thiamten an lo phochhuak ṭha hle a, Mizo hla phuahtu hmasate'n Mizoram mawina te, lui leh tlang, thing leh mau leh nungcha chungchang an lo tarlante kha a hlu takzet. Tunlai hunah hian khatianga infuihna thu ṭha kha kan la mamawh reng a ni," a ti.

Thing leh mau, nung­chate humhalh turin sorkar pawhin a theih ang angin hma a lak mek thu sawiin EFCC Minister chuan, "Luipui kam humhalh turin project lian tak kalpui mek a ni a, G20 summit thupui - One Earth, One Family, One Future tih hian khawvel mihringte hi chhungkaw pakhat, mamawh leh harsatna inang tlâng kan nih thu a tarlang," a ti a, G20 thupuiin a tum zingah khawvel lum zel (global warming) ti ziaawm tura ṭan lak a tel thu a sawi.

Seminar-ah hian Mizoram pawn aṭangin resource person pathum, Aizawl pawn aṭangin pathum leh Aizawl chhung aṭangin 13 an tel a; vawiinah chhunzawma zawh a ni ang.