Mizorama raltlante chungchang sawiho a ni

Manipur tualchhung buaina vanga sahimna zawnga Mizorama rawn lutte enkawl dan tur ngaihtuah tura sorkarin a ruat - High Level Committee on Internationally Displaced Persons of Manipur in Mizoram chu an chairman Lalchamliana, Home minister hoin nimin khan FSL conference hall-ah an ṭhukhawm. Home Minister chuan Mizoramah raltlan 50,000 chuang an awm mek thu a sawi.

Lalchamliana chuan, Myanmar leh Bangladesh aṭangin tun dinhmunah Mizoramah raltlan 50,000 chuang an awm mek thu a sawi a, "Covid-19 vanga harsatna kan tawhin ziaawm lam a pan mek laiin Manipur-a kan unauten harsatna namen lo an hmachhawn leh a, kan hnuchhawn thiang lo," a ti.

Mizoram sorkar sum dinhmun leh hmanraw neihte'n tuar deuh dawn mah se, raltlante chu puih zel an tum thu sawiin Home Minister chuan, "Kan unaute an nih bakah, Covid hripui len lai pawha Mizo tlawmngaihna nen hmangaih taka min lo ṭanpuia min lo thlamuantute an nih avangin theihtawp chhuahin kan lo buaipui zel dawn," a ti bawk.

Ṭhukhawm chuan resolution siamin - 'Kan unau Manipur aṭanga raltlante hian ei leh bar leh tawmhulnaah harsatna an neih lohna turin theihtawpa ṭanpui zel ni se' an ti.

ṬHUTKHAWMA TARLANTE

▶ Raltlan rawn lutte chhinchhiahna mumal leh felfai tak siam turin data ṭha neih a ṭul

▶ ICT department-in Management Information System (MIS) lo buatsaih se.

▶ Chhungkhat laina belh tur nei lote awmna tur sorkar hmunhma hman mek leh hmun dang ngaihtuah belh bakah, hmun remchang dang thlithlai lâwk ni se.

▶ Raltlan zinga sikul naupangte chu zirna-in hrang hrangah document phût loa admit turin School Education department lamin thuchhuah an siam tawh.

▶ Hetiang deuh hian college zirlaite zir chhunzawm dan tur ruahman a ṭul.

▶ Raltlante hriselna endika, uluk taka vil zui a ṭha.

▶ Chief Minister-in Manipur aṭanga raltlante chhawmdawlna tur sum Prime Minister hnena a dil chu rang taka bawhzui tur intirh.

▶ Raltlante chhawmdawlna kawngah tlawmngai pawl, kohhran leh mi tinte inphalzau turin an ngen.