KHAWTHLIR

Aizawl Traffic Police khawmpui

Aizawl Traffic Police chuan June 4, Pathianni chawhnu khan inkhawmpui an hmang a, DGP Devesh Chandra Srivastva-a'n a hmanpui. Inkhawmpui hi Traffic Aizawl SSP Stephen Lalrinawma'n a kaihruai a, traffic police officer leh staff 300 chuang an tel. Traffic police mi pariat hnenah an thawhrimna leh duty-a inpekna ngaihhlutna certificate leh reward pek a ni. DGP kaihhruaiin Samellan (Sampark Sabha) neih nghal a ni a, harsatnate leh mamawh hrang hrang an neihte an sawiho.

Ganja halral

Champhai Police leh Khuangleng village defence party (VDP) chuan June 3, 2023 khan Khuangleng khaw ram leh a chhehvela ganja (cannabis) tual ṭo vaiin an halral a, ganja an halral hi a vaiin kg. 200 chuang a ni.

Silai mu man

Lungleia hmunpui nei Assam Rifles sipaite chuan June 4, Pathianni khan Lawngtlai district-a Parva khaw bulah mi pahnih hnen aṭangin silai mu tam tham tak an man. Silai mu an mannate hi KCNA mi leh sa nia hriat a nih thu Assam Rifles hotute chuan an tarlang.

Thing phun

Institute of Bioresources and Sustainable Development (IBSD), Research Institute, Mizoram chuan nimin khan World Environment Day denchhenin Basic Services to the Urban Poor (BSUP) camp, Lawipu compound chhungah thing an phun.

Loneitute kawm

Embassy of Israel-a Attache Agriculture MASHAV Yair Eshel chuan nimin khan Indo Israel Village of Excellence CoE for Fruits Lungleiah loneitute a kawm a, Israel-in centre a enkawl zingah Mizoram a harsat ber thu sawiin, "In sik leh sa leh ram hmelhmangin a zir lo a, chuti chung chung chuan theihtawp kan chhuah zel ang," a ti a; Mizoram tan ruahmanna ṭha zawk siam a ngaih thu leh hmunpui lama a thlen tur thu a sawi.