Kan dahkham chu dikna, rinawmna leh huaisennate a ni - ZPM Vice President

ZPM vice president Dr Kenneth Chawngliana chuan nimin khan an party pisaa inkhawmah thu sawiin, "ZPM hian Mizoram - retheihna laka chhan chhuak tura chona, ngenna tender hi kan rawn chháng a, kan dahkham chu dikna, rinawmna leh huaisennate a ni," a ti.

Dr Kenneth Chawngliana chuan, Mizoram ei leh bara a intodelhna tura Brig. T Sailo leh Laldenga te hmalakna sawiin, T Sailo-in 'Six Basic Needs' hmangin chak takin a thawk a, kum khata vawi hnih thar buh hmuh chhuah a nih thu leh, Laldenga sorkarah phai záwl leh ram awih tlâna leilet siamna turin bulldozer 30 chuang lei a nih thu a sawi.

Laldenga kaihhruai sorkar a tlâk hnuah bulldozer-te chu Lal Thanhawla kaihhruai sorkarin a ngaihsak zui lo nia sawiin Kenneth Chawngliana chuan, "Ramhnuai leh daitàmah a rîral ta mai mai a ni," a ti a; Lal Thanhawla sorkar leh Zoramthanga sorkarte chu sum sem policy nei an nih thu sawiin, "Kum 35 chhung, kumin 2023 thleng hian min ṭhut bet ta a ni," a ti.

ZPM Vice President chuan, kum 35 chhunga Mizoramin hmasawnna a hmuh chak loh chhana mawhphurtu chu Congress leh MNF party-te an nih thu sawiin, "Zo fate retheihna saltànna ata chhanchhuah kan ngai. Kum 35 min lo kaihruai tawhtu party pahnihte hi chuan chhanna min pe thei lo a ni lo'm ni ?," a ti a; ZPM chuan kut hnathawktute hmasawnna an ngaih pawimawh ber thu leh ei leh bara intodelh ngei tura an beih dawn thu a sawi bawk.