LMC chhunga mi job card neite tan ni 100 inhlawhna tur sum la dah rih lo

Lunglei Municipal Council (LMC) ding tawh mah se, a huam chhunga mipuite chu ni 100 inhlawhna (MGNREGS) hnuaiah inhlawhtir tum a ni a, an inhlawhna tur sum ruahman/dah erawh a la awm lo.

LMC inthlan dawna campaign hun lai, March 25, 2023 khan MNF Ṭhalai chuan thuchhuah siamin, "Lunglei hi Municipal Council inenkawlna hnuaia awm tur mah ni se, mipuite'n ni 100 inhlawhna an kalpui zel theih nan MNF sorkar chuan budget-ah a dah fel tawh bawk a ni," tiin an tarlang.

LMC huam chhunga awm, MGNREGS hnuaia job card neite kum 2023-24 chhunga an inhlawh theih dawn leh dawn loh chungchang hi Rural Development department leh Lunglei BDO-ah RTI Act tlawhchhanin zawhfiah a ni.

LMC huam chhunga MGNREGS job card neite municipality hnuaia awm tawh chungin kum 2023-24 financial year chhungin an inhlawh ve theih dawn leh dawn loh zawhna chhangin RD department SPIO chuan, "Ministry of RD, Government of India-ah hmalak zel dan tur suggession/comment thehluh a ni a, MoRD thuthlukna nghah mek a ni. Hemi chhung leh inher rem chhung (transition period) hian ni 100 inhlawhna kalpui chhunzawm rih tum a ni," a ti.

He zawhna hi Lunglei BDO chuan, "RD department, Govt. of Mizoram lehkha No.C.30019/2/22-RD(NREGS)/Loos; dr. 17.4.2023 kan hmuh angin hna hi thu leh awm hma chu la thawh rih tur a ni," tiin a chháng.

Kum 2023-24 chhungin LMC huam chhunga mite ni 100 inhlawhna tur sum ruahman a nih leh nih loh zawhna chhangin, RD department chuan, "Mizoram puma MGNREGA hmalak dan tur Labour Budget (LB) leh Annual Action Plan (AAP) chungchang ngaihtuahin Union RD Secretary hoin March 21, 2023-ah Empowered Committee ṭhut a ni a. Chu LB leh AAP-ah chuan Lunglei chhunga job card holder-te pawh huam tel an ni," a ti.

Sum ruahman zat zawhna chhángin RD department chuan, "Ministry of RD, Government of India-in sum ang zâwngin min chhûtsak ngai lo a, Mizoram pum tan kum 2023-24 atan Rs 175 lakhs persondays Labour Budget min approve sak phawt a ni," a ti. Hetih lai hian, Lunglei BDO chuan, "Sum ruahman/dah a awm lo," a ti thung.

RD department chuan LMC huam chhungah hian MGNREGS job card nei mi 12,996 (April 13, 2023 angin) an awm tih a tarlang a; Lunglei BDO chuan mi 12,860 an awm tih a tarlang thung a ni.