CM-in Hnahthiala sorkar hmalakna a enfiah
Chief minister Zoramthanga chuan nimin khan Hnahthiala deputy commissioner office sak mek leh PWD complex-a circuit house sakna tur hmun tlawhin a enfiah.
Hnahthial PWD Inspection Bungalow-a inkhawm buatsaihah CM Zoramthanga chuan, Hnahthial khawpui chu district headquarters entawn tlaka siam tum a nih thu sawiin, district thar pathum tihpuitlin a nih hnuah Mizoram sorkarin DC pisa dinna tur district thar pathum tan cheng vbc. 10 ṭheuh sum a dah thu leh harsatna karah hmalak zel a nih thu a sawi.
Zoramthanga chuan, district thar pathuma hmalaknate chu a enpui dan leh DC hmunhmate chu a daihzai zawnga hman a nih theih nan pisa pakhat aia tamte'n an hman ṭangkai tura ruahman a ṭul thu a sawi a; ṭhahnemngai taka an khua leh district hmasawnna tura hnathawhte ṭawiawm zel turin mipui a chah.
Chief Minister chuan, ram changkang leh upa, kum za tél hmasawnna kalpui tawhnate anga Mizoram siam turin ram hmasawn theih dan tur hmathlir thui tak neih a ṭul thu sawiin, ṭhahnemngai taka ṭan lak a nih chuan Mizoram chu ram entawn tlakah la siam theih a nih thu a sawi a; ram hmasawnna atan ram neitute chu a enkawltu an nih a pawimawh thu sawiin, "Hnam thinlung put hi kan ramin a mamawh. Ram siamṭha tur chuan ram mipuite ram hmangaihna nen thawhho zel a pawimawh," a ti.
CM Zoramthanga hian PWD engineer leh architect-te nen circuit house sakna tur hmunhma an enfiah a, DC pisaa thawkte nen an inkâwm bawk. DC Complex-ah hian DC pisa bakah, Land Revenue & Settlement leh Information & Communication Technology department pisa a awm a ni.