EFCC Minister-in Ṭamdil Wetland Interpretation Centre & Herbarium a hawng

Environment, Forest & Climate Change (EFCC) minister TJ Lalnuntluanga chuan nimin khan Ṭamdil Wetland Interpretation Cen­tre & Herbarium a hawng.

Ṭamdil Wetland Inter­pretation Centre & Her­barium hi Mizorama din hmasak ber leh a awmchhun a ni a; a hawngtu EFCC Minister hian thing ṭiak chi hrang hrang tihpunna leh enkawlna, Central Nursery, Tuirialah a hawng nghal bawk.

TJ Lalnuntluanga chuan, a ram leh a felna zawn hmasak zel a nih chuan Mizoramin hma a sawn zel tur thu sawiin, "Kan ramah kan beisei leh hriat ngai loh hmasawnna thar kan hmu zel a, hmasawnna a thleng mek a, a thleng zel dawn. Beidawnna tur a awm lo. Kan hruaitu hmasa leh thawktu hmasate hnathawh a fakawm tak zet a ni." a ti.

Pathian thil siamte duat taka enkawl chu EFCC department nen a inhmeh hle tih sawiin Minister chuan, "Pathian thil siam humhalh hi mihringte mawhphurhna a ni," a ti a; Mizo hnam leh sakhuana kalpui dan pawh Pathian thil rêl dan nen a inrem hle tih a sawi.

EFCC Minister chuan, Mizoramin hmasawnna a hmuh mek laiin, mi ṭhenkhatin hmasawnna nei lo ang leh ram kal danah mipui tibeidawng thei zawnga thu thehdarh leh a chhe lam chauh sawi an awm ṭhin niin a sawi a, "Chu chuan ṭhalai, mipui vantlang a tihhnual ṭhin. A êng zawng leh beiseina nung nena hmathlir neih a ngai a, ngaihtuahna hman tlàn a tul tak zet a ni," a ti.