RRR Centre kalpui ṭha ber AMC Ward-VIII

AMC ward tina Reduce, Reuse and Recycle Centre (RRR Centre) kalpui ṭha lawmman June 5, Thawhṭanni khan AMC Auditorium-ah sem a ni a, RRR Centre kalpui ṭha berah Ward-VIII thlan a ni.

Meri Life, Mera Swachh Shehar Campaign, 2023 (Ka chenna, ka khawpui faina atana beihpui) hnuaiah May 20, 2023 khan AMC ward tinah RRR Centre hawn a ni. Centre-ah chuan thawmhnaw hlui, lehkhabu hlui, plastic úm ruak, naupang inawm tleina hmanraw hluite a duh apiang tan dah khawm theih a ni a; chu'ngte chu thil dang atan ṭangkaia hman nawn leh tura ruahman a ni.

RRR Centre-te chu June 3-5, 2023 chhung khan endik a ni a, June 5, Thawhṭanni khan Centre kalpui ṭhate hnenah lawmman hlan a ni. Hlanna inkhawm hi AMC joint municipal commissioner Lalremruata Kullai-in kaihruaiin, Aizawl mayor Lalrinenga Sailo, municipal commissioner Lalhriatpuia leh Swachh Bharat Mission (Urban) state mission director H Lianzela ten thu an sawi.

AMC ward zinga RRR Centre kalpui ṭha ber chu Ward-VIII (Armed Veng, Armed Veng South & Chite Veng) niin, Ward-X (Zotlang, Chawnpui, Zonuam & Govt. Complex) leh Ward-XV (Bungkawn, Bungkawn Vengthar, Nursery, Maubawk & Lawipu)-te chu pahnihna leh pathumna an ni. Ward-II (Bawngkawn, Bawngkawn South, Chaltlang & Lily Veng) leh Ward-XIX (Kulikawn, Tlangnuam, Tlangnuam Vengthar, Saikhamakawn, Melthum, Hlimen) hnenah consolation prize hlan a ni bawk.

RRR Centre 19-ah hian June 5, 2023 thleng khan plastic kg. 471.3, lehkhabu hlui 7,526, thuamhnaw hlui 1,782 leh pheikhawk hlui bun 888 dah a ni tawh.