Zirlai 20.25%-in zirlaibu an la dawng lo

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; July thla hi first term exam hun a nih tawh laiin, sorkar sikula zirlai 20.25%-in zirlaibu an la dawn loh thu an sawi.

AAP Mizoram president Andrew Lalremkima Pachuau chuan, Mizoram sorkarin zirna a ngaih pawimawh a ṭul thu a sawi a, "Tunah hian sikul ṭan a nih aṭangin thla thum a liam tawh a, July thlaah hian first term exam an hmachhawn tawh dawn. Hetih lai hian, sorkar sikul ṭhenkhatin zirlaibu an la dawng kim lo a, pawi kan ti tak zet," a ti.

Sorkarin zirlaite hnena an mamawh ang a pek chu a mawhphurhna a nih thu sawiin Andrew Lalremkima chuan, "Sorkarin zirlaibu print tura a tihte kan bia a, tunah hian pawl 7 zirlaibu science, mathematics leh hindi-te an la print lo. Zirlaibu dawng tawh sikul zingah subject la dawng kim lo an awm," a ti a; sikul ṭhenkhata zirtirtute chuan zirlaite chu kum hmasaa pass tawhte lehkhabu hlui an rintir thu a sawi.

Andrew Lalremkima chuan, May 17, 2023 khan Governor Dr Hari Babu Kambhampati hnenah sorkar sikula zirlaite'n zirlaibu an la dawn kim loh thu leh hmalakpui tura ngen thu a sawi a, "Larsap chuan Education department-ah min nawrpui a, nimin (June 5, 2023) khan Education department-in zirlaibu an sem tawh dan Larsap hnena an pek kan dawng. Education department-in an tarlan dan chuan May 22, 2023 thleng khan Mizoram pumah zirlai 79.75% hnenah zirlaibu an sem tawh a ni," a ti.

AAP Mizoram hruaitute chuan, Mizoramah MLA an neih chuan MLA fund zinga 20% chu zirna atan an hman dawn thu an sawi a; sorkar hotute'n sorkar sikulte an ṭha nia tun hnaia an sawi ṭhin chungchangah, sikul ṭha an tehna hriat an châk thu an sawi bawk.