CM-in kawng 9 leh tuikhuah 39 a hawng

Chief minister Zoramthanga chuan June 5, Thawhṭanni khan Sihphir leh Sihphir Venghlun huam chhunga Agriculture department hmalaknaa siam agriculture link road pariat leh tuikhuah 39 a hawng.

CM-in kawng a hawnte chu - Special Assistance to State for Capital Expenditure, NABARD Rural Infrastructure Development Fund leh Rashtriya Krishi Vikas Yojana - Remunerative Approaches for Agriculture and Allied Sectors Rejuvenation hnuaia agriculture link road laih thar pathum, km. 7-a thui leh kawng awm sa panga, km. 9.58-a thui thawm ṭhatte a ni a, cheng nuai 547.98 sên a ni. Tuikhuahte chu Pradhan Mantri Krishi Sinchayee Yojana hnuaia siam a ni a, cheng nuai 36.20 sên a ni.

Hawnna inkhawm hi Sihphira Rohrenga Hall-ah neih a ni a, Agri­culture secretary C Lalrosanga'n a kaihruai. CM Zoramthanga leh Agriculture minister C Lalrinsanga ten thu an sawi bakah, Agriculture director James Lalsiamliana'n technical report a pe.

CM Zoramthanga chuan, Mizoram chu ram leilung ṭha, thlai engkim ṭhat duhna ram a nia sawiin, "Kut hnathawktute'n an thlai thar phurh chhuahna kawnga harsatna an tawh chu sorkarin a hriatpui a, awlsam zawka an phurh chhuah theihna tur kawng siam hi sorkarin a ngai pawimawh a, hma a la zel dawn," a ti.

Agriculture minister C Lalrinsanga chuan, department a enkawl hnuaia hmalakna hrang hrang sawiin, Sihphirah PMKSY Har Khet Ko Pani hmangin mi 20 hnenah tuizem pek a nih thu te, RKVY hnuaiah Sihphir leh Tuirialah Solar Cold Storage din a nih tur thute a sawi a; Lunglei Vuakzawl hmunah thlawhna ṭumhmun siam a nih ngei theih nan sorkarin hma a lak mek thu a sawi bawk.