MLA-in Lungleia hnathawh enfiah

Lunglei High Powered Committee (HPC) vice chairman Lawmawma Tochhawng, MLA chuan nimin khan Lunglei HPC kaltlanga UDPA department-in Lunglei khawpui chei mawi hna a thawh tur leh Lunglei police-in departmental work-a police station an sak mekte a enfiah a; harsatna an neih chuan a hnenah thlen vat turin a chah.

UDPA department hian Lunglei HPC kaltlangin Lunglei khawpuia retaining wall rawng hnawih, tui luankawr siam leh thawm ṭhat, kea kalna (footpath) siamṭhat leh a vawnbán siam leh thawm ṭhat hna an thawhna turin kum 2023-24 aṭan cheng nuai 71 a dah a ni. Kum 2022-23 chhung khan hna hrang hrang atan hian HPC sum cheng nuai 66.69 an hmang tawh bawk.

Lunglei HPC sum cheng nuai 30 sénga Lunglei Police Station thawm ṭhat hna hi departmental-a thawh a ni a; July 2023 chhungin zawh hman an inbeisei thu police hotute chuan an sawi.

HPC Vice Chairman chuan, Lunglei police-te thawhrimna leh inpekna fakawm a tih thu sawiin, hmunhma ṭha zawk an neih chuan an hnathawhnaah phûrna thar a pek ngei a beisei thu a sawi a; Lunglei PS thawm ṭhat hna chu a nih tur ang taka uluk leh ṭha taka an thawh avangin a lawm thu a sawi bawk.