Minister-in zirlaite lawmpuina a hlan

Minister of state Robert Romawia Royte chuan nimin khan a bial, Aizawl East-II chhunga HSLC leh HSSLC exam 2023-a pass-te lawmpuina hun Dawrpui Multipurpose Hall-ah a buatsaih a, zirlaite chu kawng engkimah fimkhur tur leh taima taka zir zel turin a fuih.

Robert Romawia Royte chuan, HSLC leh HSSLC pass tharte chu a chhuan thu a sawi rualin, pass zo lote chu beidawng loa nasa zawka zir zel turin a chah a, "Zirlaite hi hnam ro hlu, Zoram nghahfâk, nakina Mizoram kaihhruaitu turte an ni," tiin, kawng engkimah fimkhur tur leh taima taka zir zel turin a fuih a ni.

Minister chuan, "Matric pass hian nun kawng péngṭhuam pawimawh takah mihring a hlangkai a, eng kawng nge kan zawh zel dawn tih thlang thei dinhmunah kan awm tih inhria a, ngaihtuahna fím kan hmang a ngai. Pawl 12 pass-te pawh college lamah nun thar zir turin an kai dawn a ni," a ti a; ‘A bul ṭan ṭhat chu a chanve zo ang a ni’ tih chu zirlaite'n a takin nunpui se a duh thu a sawi.

Robert Romawia chuan, social media hman danah Mizote inzir thar a ṭul thu sawiin, "Thu dik lo leh a chhe zawng, mi rilru tina thei zawnga thu post leh thehdarh bànsan a hun tawh," a ti a; zirlaite chu puitlinna kawng zawh mek an nih angin, social media hman danah fimkhur turin a chah.

Inkhawmah hian School Education director Lalsangliana pawhin thu a sawi a; Aizawl East-II chhunga HSLC leh HSSLC-a top 10-a langte hnenah laptop pek a ni a, subject topper-te hnenah smartphone, distinction-a pass-te hnenah Rs 5,000 leh division danga pass zawng zawng hnenah lawmpuina thilpek hlan a ni.

Minister hian Aizawl East-II chhunga YMA branch paruk hnenah ruihhlo dona leh zirna chawikanna atan MLA fund aṭangin Rs 1,00,000 ṭheuh a pe bawk.