Siaha district-a bank-te hnathawh thlirho

Siaha District Consultative Committee/District Review Commitee/District Security Committee chu nimin khan an chiarman Lalhmunsanga Hnamte, bawrhsap hoin an ṭhukhawm a; January-March 2023 chhunga Siaha district-a bank-te hnathawh leh hmachhawpte an thlirho.

Ṭhutkhawmah hian Siaha district-a pawisa thîr (coin) léng vel tlem lutuk leh chumi kaihhnawiha hmalak dan tur sawiho a ni a, "Pawisa thir léng vel tlem lutuk hian kan district-ah thil man a tihto bakah, thûk takin kan district economy thlengin nghawng a nei a ni," an ti. Pawisa thir léng vel titam tur leh hmang uar leh tura hmalakna chi khat atan Coin Mela buatsaih an rêl.

Mipuiin Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) hamṭhatna an dawn vek theih nan zirtirna leh thil ṭul dangte buaipui turin Siaha district-a bank pasarihte chuan Siaha district-a khaw awmte chan insemin an tuam chhuak vek dawn tih tarlan a ni.

Siaha district mipuiin digital banking an uar a ṭul thu sawi a ni a; September 30, 2023 thleng bank-ah Rs 2,000 note thleng theih a ni tih mipuiah puanzar tam a ṭul thu sawi a ni bawk.