ISHTH Campaign chungchang sawiho

Lunglei leh Champhaiah nimin khan an district-a Integrated STI, HIV, TB and Hepatitis (ISHTH) Campaign kalpui tur chungchang zirhona leh inràwnkhawmna buatsaih a ni.

ISHTH Campaign hi District Jail leh home hrang hranga awmte'n hriselna ṭha an neih theih nan te, hri inkai chhàwn theihte laka invên nana an hriselna dinhmun enfiah kawnga beihpui thlâkna tur a ni a; district hrang hrangah kalpui a ni dawn.

Campaign hi Lungleiah chuan June 9, 2023-ah hawn a ni ang a, District Jail bakah home hrang hrang leh inenkawlna hmun thlan chhuah pariatah kalpui ṭan a ni ang. Champhaiah chuan June 12, 2023-ah campaign hawn a ni ang a, Champhai District Jail bakah, Champhaia home hrang hrang leh inenkawlna hmun 11-ah campaign kalpui tum a ni.

ISHTH Campaign-ah hian hriselna lama thiamna neite'n hriselnate endikin, councelling pawh neih a ni ang. Damdawi hmanga enkawl ṭul angte buaipui tum a ni a, inzirtirna hunte hman tum a ni bawk.