Minister-in Health Clinic thar a hawng

Minister Lalrinawma chuan nimin khan a bial chhunga Chhiahtlang Venghlunah Health Clinic Centre thar a hawng a, Chhiahtlang Higher Secondary School-a zirlai hlawhtlingte lawmpuina hun a hmanpui bawk.

Health Clinic Centre-ah hawnnaah Lalrinawma chuan, eizawnna, hriselna leh zirnate chu a rilru a kap lian ber a nih thu sawiin, "Hmalakna pawh kan kalpui tam a, ka biala mipui 75% velte'n ni tin hna thawka an lo lam an pan ṭhin avangin a lo nawmsak zual nan an feh kawng kan lài nasa hle a, MLA fund kan hman nasat berna pakhat a ni," a ti a, hriselna lamah pawh hma an lâk nasat thu a sawi.

Chhiahtlang North Health Clinic Centre hi Chhiahtlang North VC-in NH-54 siamna tura zangnadawmna an dawn hmanga sak a ni a, health worker pakhat leh helper pakhatin an ṭhutchilh dawn bakah, an hnuaiah accredited social health activist (ASHA) pathum a awm dawn a ni.

Chhiahtlang HSS-in an sikulah HSSLC Examination 2023-a an zirlai hlawhtlingte lawmpuina hun an buatsaihah minister Lalrinawma chuan, MLA fund chhuak leh hmasa ber aṭangin sikul sak bul ṭanna tur a pek tur thu a sawi a, "Sikul building thar in mamawhzia ka hriatpui che u a, kan fund beiseite kan nghah mek lai hian a bul hi MLA fund Rs 3,00,000-in lo ṭan phawt mai ila a ṭha ang," a ti.

Lalrinawma chuan Mizoramin mi rintlak tak a mamawh tih sawiin, "Kan awmna hmun ṭheuhah, kan hnathawhna ṭheuhah, mawhphurhna kan chelhna tinah rintlak nih tum ang u. Thil ṭha lo a lo thlen hian a phènah mi rintlak lo an lo inphúm cháwk a, chutiang mi kan tam chuan ram leh khawtlang hian hmasawnna a hmuh tur ang a hmu pha lo ṭhin," a ti a; zirlaite chu taima taka zir zel turin a fuih.

Chhiahtlang HSS hi kum 2014-ah din a ni a, kum 2017-ah provisional status pek niin, kum 2018-ah lumpsum aided-ah hlàn kai a ni.