KHAWTHLIR

YMA-in thisen pe

YMA, Lawipu Branch chuan an branch din champha vawi 33-na pualin nimin khan an vengah thisen pek an huaihawt a, Civil Hospital, Aizawl tan thisen unit 35 an pe a, petute mipa 33 leh hmeichhia pahnih an ni.

Kuhva rah man

42nd Assam Rifles, Serchhip battalion mite chuan June 5, Thawhṭanni khan Champhai Tlangsam huam chhungah Myanmar aṭanga dan loa lak luh kuhva rah ip 60 (kg. 4,200) an man a, cheng nuai 29.40 hù a ni.

Heroin man

Champhai police-te chuan Hnahlan leh Tualcheng khua leh a chhehvelah search operation an nei a, nimin zing dar 3 vel khan Tualcheng dáiah mi pahnih hnen aṭangin heroin kg. 3.02 (hawng 250) an man a, international market-ah cheng vbc. 15 chuang hù a ni. Heroin phurhna lirthei MZ-04 A-8486 leh lirtheia chuang Neezam Uddin (48), Nilam Bazar, Karimganj leh Ismail Ali Laskar (27), Ramnathpur, Hailakandi, Assam nia insawite an man bawk.

NQAS training

Mamit Chief Medical Officer office leh Mizoram Health System Strengthening Project chuan nimin khan IPR conference hall-ah Mamit district-a damdawi-inte a changtlun zel theih nan National Quality Assurance Standard training an buatsaih. Training-ah hian medical officer, nurse, block account manager, PHC, CHC leh District Hospital-a thawktute an tel a, vawiinah chhunzawma zawh a ni ang.

Ruihhlo do sawiho

Champhai District Nasha Mukt Bharat Abhiyaan Committee chu nimin khan an chairman James Lalrinchhana, district bawrhsap hoin DC conference hall-ah an ṭhu a, ruihhlo donaa hmalak dan leh hmachhawpte an sawiho. Naupang kum tling lo, a bik taka enkawl ngaite chu ngaih pawimawh zual a ṭul thu an sawi.