Cooperative society zirhona buatsaih a ni; society dinah Mizoram a che ṭha lo

National Council for Cooperative Training (NCCT) chuan nimin khan SCOPE Convention Centre, Delhi-ah Outreach & Dissemination on New Initiatives/Schemes and Achievement for the Cooperative Sector an buatsaih a; cooperative society din chak lohna state tarlan zingah Mizoram a tel.

Workshop hi NCCT secretary Mohan Kumar Mishra-in a kaihruai a, Mizoram aṭangin Vanglaini news editor Malsawm-dawngzela Hrahsel leh The Zozam Times news editor H Lalchhandama te an tel a ni.

Workshop hawngtu Ministry of Cooperation secretary Gyanesh Kumar chuan, cooperative society pawimawhna te, a tam thei ang din a ṭul thu te, society-te hamṭhatna tura an hmalakna leh hmachhawpte a tarlang.

Zirhonaah hian India ram state hrang hranga primary agriculture credit societies (PACS), dairy/fisheries cooperative societies-in a huam chin tarlan a ni a, 80% chung lam, 60-80% inkar, 40-60% inkar, 20-40% inkar leh 0-20% inkarahte ṭhen a ni.

PACS din chak lohna state, 0-20% inkara awm state pali zingah Mizoram a tel a; dairy cooperative society-ah pawh a hniam ber (0-20%) inkara awm state 11 zingah a tel bawk.

Workshop-a tarlan danin, PACS-te'n hamṭhatna ṭha zawk an neih theih nan leh sumdawnna zau zawk an neih theih nan Model By-Laws for PACS chu state/union territory 10-in an la hmang lo a, chu'ng zingah chuan Mizoram a tel. State/UT 10-te hian June 2023 chhungin hman hman an tum nia tarlan a ni.

Model By-Laws for PACS hi January 5, 2023 khan state leh UT-te pek vek an ni a, an duh chuan an state mila her danglamin hman phalsak an ni.

Tun dinhmunah India ramah PACS 1,01,285 awmin, member vbc. 13 chuang an awm a; dairy cooperative society 1,38,347 awmin, member vbc. 1.5 chuang an awm bawk.