Delhi-a mayor intawhkhawmah Aizawl mayor Lalrinenga a tel

Nimin khan Pragati Maidan, New Delhi-ah 2nd All India Mayors & RWAs Summit 2023 neih a ni a, Aizawl mayor Lalrinenga Sailo telin, thu a sawi bakah, Green India Award ṭhenkhat semtir a ni.

Intawhkhawmah hian Lalrinenga Sailo chuan, Aizawl Municipal Corporation-in Aizawl khawpui a enkawl dante sawiin, local council hnathawh leh an ṭangkai dante a sawi a, state páwn lam aṭanga tlawhtute'n Aizawl chu fai an tih thu sawiin, "Lirthei khalhtute pawh an hawihháwm a, silent city titein min sawi ṭhin," a ti.

Aizawl Mayor chuan, bawlhhlawh paih leh sâwngbàwl dan sawiin, Aizawl khawpuia bawlh-hlawhte chu public private partnership (PPP) mode-a kalpui a nih thu te, tun dinhmunah ni tin bawlhhlawh garbage truck 150 hmangin paih ṭhin a nih thu te, AMC budget aṭanga 21.51% chu bawlhhlawh paih leh sâwngbàwlna atan dah a nih thute a sawi bawk.

Aizawl Mayor hi AMC joint commissioner Lalremruata Kullai, exe­cutive engineer R Lal­muanpuia leh official dangte'n an ṭawiawm a; Lalremruata Kullai hian Aizawla bawlhhlawh sâwngbàwl dan a sawifiah a ni.