Airport atan Vuakmual enfiah a ni

Lunglei aṭanga khaw­thlang lama Vuakmual an tihah thlawhtheihna ṭumhmun (airport) siam theih a nih dawn leh dawn loh nimin khan helicopter hmangin thuneitute'n an enfiah.

Sorkar thuchhuah tarlan danin, Vuakmual aerial survey titute hi Agriculture minister C Lalrinsanga, Rajya Sabha MP K Vanlalvena, Lunglei HPC vice chairman Lawmawma Tochhawng te an ni a; IPR department officer leh Lunglei MJA aiawhte'n an ṭawiawm. Enfiahtu zingah thlawhtheihna leh a ṭumhmun lam kaihhnawiha mithiam (technical mi) an tel thu tarlan a ni lo.

Mizoram sorkar ngenna avangin April 14, 2023 chawhnu khan Civil Aviation Ministry-ah Civil Aviation secretary Rajiv Bansal leh Mizoram chief secretary Dr Renu Sharma te hoin Civil Aviation Ministry, Directorate General of Civil Aviation leh Pawan Hans hotute leh Mizoram sorkara GAD hotute an ṭhukhawm a, Mizoram chhim lamah thlawhtheihna ṭumhmun siam theih dan tur sawiho a ni tih sorkar thuchhuahin a tarlang.

Ṭhutkhawmah hian, "Mizoram sorkarin a ṭul angin thlawhtheihna ṭumhmun (greenfield airport) siam theihna hmun tur lo identify (zawng) se la, hmun identify a nih hnu hian detailed survey leh detailed project report-te buatsaih ni se," tiin thu an dah.

Thuneitute ṭhukhawm rorel bawhzuiin nimin khan sorkar hotute'n Vuakmual tlangdung chu helicopter aṭangin an enfiah a, greenfield airport siam theihna a nih leh nih loh te, a chhehvelah terminal building, fire station leh thil dang pawimawh sakna tur a awm leh awm loh te, Vuakmual chhehvelah thlawhtheihna ṭum tur leh thlâwk chhhuak tur tana hnawk thei tur tláng a awm leh awm lohte an enfiah a ni.

Nimina Vuakmual enfiahna hi a ṭum khatna a ni a, technical survey pawh neih thuai tur a nih thu te, Vuakmual panna kawng chu Lunglei aṭangin km. 25-30 inkar vel ni tura chhût a nih thu te, a panna kawng siamna turah mimal ram a awm leh awm loh la finfiah leh tur a nih thute sorkar thuchhuahin a tarlang.
Vuakmuala airport siam tum hi sorkar laipuia Ministry of Civil Aviation hnuaia Regional Connectivity Scheme (RCS) – Ude Desh Ka Aam Nagrik (UDAN) 5.0 kaltlanga ruahman a nih theihna turin Mizoram sorkar chuan sorkar laipuiah dilna a thehlut tawh a ni.