June 13, 2023 aṭangin EVM enfiah dawn

Mizoram chief electoral officer (CEO) Madhup Vyas chuan, kumin kum tawp lama Mizoram inthlanpui inbuatsaihna atan June 13, 2023 aṭangin electronic voting machine (EVM) first level checking kalpui ṭan a ni dawn tih a sawi.

CEO Madhap Vyas hian nimin khan Kolasib tlawhin, kumina MLA inthlanpui neih tura inbuatsaihnate a endik a; DRDO conference hall-ah electoral registration officer, assistant electoral registration officer leh booth level officer-te nen an inkâwm.

CEO chuan, Mizo­ramah inthlanna lang­tlang leh felfai a awm theih nan inthlan buaipui tura mawhphurhna neite chu Election Com­mission of India (ECI)-in inkaihhruaina a duante chhiar tam turin a chah a, "Inthlang tura inbuatsaihna hmasa atan June 13, 2023 aṭangin EVM first level checking kalpui ṭan a ni dawn a, ṭha taka hna kalpui a nih theih nan fimkhur takin endik hna thawk ang che u," a ti.

Kolasib district-a ramrî-ahte ralmuanna leh boruak ṭha a awm zel theih nan district ṭhenawma thuneitute nen thawhhona ṭha nei zel tura kal khawmte chahin CEO chuan, "Polling station tinah hnathawh theih tura mamawh hrang hrang - assured minimum facilities a awm vek tur a ni. Hmeichhe vote thlakna tur bik pink polling station leh polling station ṭha taka thuam model polling station siam tur a ni," a ti. Voter 85% talin vote an thlâk theih nan ṭan la tur leh inthlan hnuhnung bera vote tlak tlemna PS-te zir chiang turin kal khawmte a chah.

January 13, 2023-a Mizoram electoral roll tihchhuah angin Kolasib district-ah hian polling station 89-ah voter 63,356 an awm a; Tuirial bialah voter 18,472, Kolasib bialah voter 23,731 leh Serlui bialah voter 21,153 an awm a ni.