MLA Vanlalthlana a biala LC-te Fund pe ngai loah MNF-in an puh

MNF Media & Publicity hruaitute chuan, Aizawl North-II bialtu MLA Dr Vanlalthlana chu a bial chhunga local council-te rêp chár a, a biala LC pakuate hnena development fund pe ngai mang loah an puh.

MNF Media & Publicity hotute chuan nimin khan Aizawl Press Club-ah thuthar thehdarhtute an kâwm a; MNF general secretary VL Krosshnehzova chuan, MLA Dr Vanlalthlana'n a biala LC te, development fund khawih tura agency dik leh rintlakte chu a rêp chár vek niin a sawi.

VL Krosshnehzova chuan, "A bial chhung veng hrang hrang LC pakuate hi fund a pe ngai mang lo a, a pek ve nia lang pahnih khatte pawh hi a hnathawh leh a hlâwkna awm zawng zawng chu ZPM-in an pumhmawm vek zel. Heti taka party invulh bikna kalpui mekin mipui sorkar an zuar ngam leh a sawitu bera Dr Vanlalthlana a la ṭang ngam hi a zahthlak hle a, mipui bum tumna dik tak a ni," a ti.ZPM Ṭhalaiin June 2, 2023-a thuchhuah an siam chungchangah Krosshnehzova chuan, "Ramhlun South YMA Y-Section in sak mek chhunzawmna tur tihfel vek tawh, ZPM huamhauh lutuk vanga cancel leh a ṭul hi a pawi hle. ZPM-in an duh ang thlapin YMA chu thuchhuah an siamtir a ni," a ti a; khawtlangah sawi neuh neuh a awm tâk avangin ZPM an inthlahrung leh a, an sût leh ta niin a sawi.

MNF Media & Publicity hruaitute chuan, ZPM-in Sustainable Development & Reform Policy (SDRP)-ah, 'ZPM sorkar chu kalphung thar, mipui sorkar, thuneihna sem zâi (Decentralization of Power & Collective Leadership) a ni ang a, sorkar chak leh huap zo siam turin... administrative reform a kalpui ang,' tiin an ziak tih an sawi a, "Thuneihna sem zâi tlangaupui chungin LC-te'n ngaihthah an hlawh hle a ni," an ti. Pawl din chawp Aizawl North Development Society hmangin ama mimal sum tur leh ZPM sum tur tuak mai turin thurawn an pe a ni.

MNF MEDIA & PUBLICITY TARLANTE

◆ ZPM-in an hmai bâl phih nan YMA an hmang leh chumi hnua an in sakna tur chhunzawm theih loa cancel a ni hi a pawi kan ti.

◆ Bialtu MLA hian ZPM party hnena percent pe kual lo hian a rang thei ang berin Ramhlun South YMA Y-Section hi an in sakna tur a pek thuai kan phût.

◆ MLA Dr Vanlalthlana’n Ramthar North Branch YMA hminga hna a pek - Construction of RCC road, cheng nuai 15 man, ZPM block-in Ramthar North venga an thawh chu Media & Publicity chuan a hmunah kan tlawh. Kawng hi meter 15 vela thui, a lian lai meter 3 vel a ni a, RCC-a siam tur a nih laiin, PCC-a siam a ni. Culvert bikah lo chuan rod hman a ni lo.

◆ Tlâk dâl siam a ni lo a, tlâk dâl hi tun hnaiah MLA fund bawk Rs 50,000-in siam thar leh a ni.

◆ Kawng siamna tura sum ruahman nuai 15 hi a tam uchuak hle a, an hnathawh dan nen a inmil lo.

◆ ZPM party-in YMA hming an tihliau hi a pawi kan ti takzet.