SSA teacher hamṭhatna tur CM sawipui

Mizoram SSA Teachers Association (MSSTA) hruaitute chuan an service-a dinhmun ṭha zawk an beisei chungchangah nimin khan chief minister Zoramthanga chu a pisaah an hmu a, lehkha thehlutin, an sawipui nghal. An inbiakna chanchin ngaichângin MSSTA member eng emaw zat CMO gate bulah an pungkhawm bawk.

MSSTA tarlan danin, an hnenah hian CM Zoramthanga chuan, SSA zirtirtute hmakhua chu a ṭha zawnga a ngaihtuah ve ṭhin thu a sawi a; high court thutlukna anga SSA zirtirtute dah ngheh (regularise) theihna tur scheme siam tura MSSTA-in a ngenna chu a lo ngaihtuah tur thu te, high court thuchhuak khing lêt (appeal) tura file kal mek pawh a zir chian tur thu leh file-in a hnen a la thlen loh thu te, CM thutlukna tel lo chuan appeal tura thutlukna siam a nih loh tur thu a lo hrilh.

Court thuchhuak khin lêt chung­chang chu CM hnena file a thlen hnuah thu chiang tak hriat theih a nih dawn thu sawiin MSSTA chuan, "Thu chiang nghah leh hret remtiin, lehkhaa ziak leh ṭawngkain pawl duh dante CM hnenah hian kan hrilh," an ti a; chanchin ngaichânga hruaitute ṭawiawmtu member-te hnenah thil awmzia an hrilhfiah hnuah pungkhawmte chu an ṭîn darh tih an tarlang.

MSSTA chuan, "High Court thuchhuak hi sorkarin appeal lo a, SSA teacher-te tana hamṭhatna ruahman nan a hman ṭangkai zawk hi kan la beisei tlat a, MSSTA chuan pawl duh dan hi sorkarin a ngaih pawimawhsak ngei a phût tlat bawk," an ti.