Tlawnga tla hlumte vui liam

Tlawng lui, Sihhmui kai aṭanga lui hnar lam Tatkawng lí-a June 6, Thawhlehnia tla hlum mi pahnih - Lalhmunsiami (31), Zonuam leh Isak Lawmsangzela (22), Nursery Vengte chu nimin khan an veng ve veah vui an ni.

Zonuam khawtlang hruaitute hnen aṭanga thu dawn danin, State Referral Hospital-a nurse hna thawk mek Lalhmunsiami d/o Zonunsanga leh Isak Lawmsangzela s/o C Thangkhuma te hi June 6, Thawhlehni khan Tlawngah an kal a, tlai lamah an bungrua (phone, pher, thuamhnaw, adt.)-te lui kamah hmuh a nih laiin, anmahni hmuh tur an awm lo a, luiah an tla hlum nia ringin Sihhmui leh Sairang lam mite'n an zawng a ni. An awmna veng khawtlang hruaitute an kal nghal bawk.

Isak Lawmsangzela ruang chu June 6 zan dar 10:30 velah Tatkawng li-ah hmuh niin, zan dar 11 velah Lalhmunsiami ruang hmuh leh a ni a; nimin khan an veng ve veah vui an ni.

An tla hlum lai hmu an awm lo a, luia an tlâk hun hriat a ni lo.