Lawngtlai district-a bank-te CD ratio 114.79% a tling

Lawngtlai DCC/DLRC/DLSC chu nimin khan sub-deputy commissioner Samuel Lalmalsawma Sailo hoin Lawngtlai Press Club-ah an ṭhukhawm. January-March, 2023 chhunga Lawngtlai district-a bank-te credit deposit ratio (CD ratio) 114.79% a nih thu tarlan a ni.

Ṭhutkhawmah hian kumin January-March chhunga Lawng­tlai district-a bank-te hnathawh leh hma­chhawpte thlirho a ni a; saturation campaign atana bank branch hrang hrangte khaw chanpual semna list chu thlirho niin, pawm a ni. June 2023 thla chhungin campaign neih ni se, an ti.

Meeting-a tarlan danin, Lawngtlai district-a bank hrang hrangte CD ratio chu 114.79% a ni a, target 60% an khûm hneh hle a ni.

Hetih lai hian, CD ratio a ṭhat viau laiin, mipui harsa zawkte leh kut hnathawktute chhawr theih tur loan ṭhenkhatah ṭan lak a ṭul thu sawi a ni a; Agriculture kaihhnawih loan pek chhuah a tam zawk theih nan line department leh bank lamte'n ṭan la zel se, an ti. Education loan pek leh puanzar lamah ṭan lâk an rêl bawk.

Pawisa thîr (coin) léng vel a tam theih nana Lawngtlai District Magistrate leh bank-te hmalaknaah hmasawnna a awm tih tarlan a ni a' nasa zawka hmalak chhunzawm zel ni se, an ti.

Pawisa lehkha (note) aiin thîra siam a hautak loh zawk avangin thîr her chhuah a tam tial tial thu te, pawisa thîr chu pawisa léng vel atana ruahman a nih thute an tarlang. Pawisa thîr hman loh chuan dawr thil leh chawhmeh man bulṭhut (base price) a san phah theih thu te, pawisa nâwi awm loh chhuanlama pawisa nawi aia thil zawrh dang inkîr a tam phah thu te, pawisa nawi inkîr kim loh a awm phah ṭhin thute an tarlang bawk.

Pawisa thîr hman uar loh vanga harsatna hrang hrang awm ṭhin sutkian a nih theih nan Lawngtlai district mipui te, dawrkaite leh bank-te chu pawisa thîr dawn leh hmanah tím lo tur leh hnar lo turin an ngen a ni.