MzSRLM Action Plan 2023-24 zirho a ni

Rural Development minister Lalruatkima chuan nimin khan Assembly Annexe Conference Hall-ah Mizoram State Rural Livelihoods Mission (MzSRLM) Annual Action Plan 2023-24 Roll Out Workshop khàrna a hmanpui.

Lalruatkima chuan, MzSRLM kaltlanga thingtlang lama harsa zawkte'n eizawnna ngêlnghet an nei thei chu lawmawm a tih thu a sawi a; "Self help group (SHG)-te hmasawnna sorkarin a ngai pawimawh a, MzSRLM leh scheme dang NREGS leh SPMRM-te nen convergence kalpui mek a ni. Convergence kaltlang hian SHG, village organisation leh cluster level federation (CLF)-te tan hmasawnna ruhrel ro tling eng emaw zat siam a ni tawh," tiin, siam zel a nih tur thu a sawi.

National Rural Livelihood Mission (NRLM) hnuaia scheme - SVEP leh AGEY kaltlangin chhungkaw tam takin hmasawnna leh eizawnna ṭha tak an hmuh thu sawiin Minister chuan, "DDUGKY hnuaia thingtlang ṭhalaite thiamna tihpun a ni leh scheme kaltlanga eizawnna ṭha tak an nei hi a lawmawm hle. Aizawlah SHG-te pualin wholesale/retail outlet neih tuma hmalak mek a ni," a ti.

Lalruatkima chuan, MzSRLM hnuaia hlawhtlingte entawn tlak a tih thu sawiin, "Ram chhunga theihna awm hâi chhuak turin mi tinin mawhphurhna an nei. India rama mi dangte entawn tlak khawpin Mizo nute hian theihna an nei a ni," a ti a; SHG hmasawnna chu chhungkua, khawtlang leh ram hmasawnna a ni tih hria a, nasa zawka ṭan la turin SHG-te a fuih.

Inkhawma tarlan danin, MzSRLM hian Mizoram district 11 leh RD block 28-ah hma a la mek a, member 75,200 awmna SHG 9,124 din a ni tawh a, village organisation 735 leh CLF 52 din a ni tawh. SHG member-te'n sum an inpûk chhàwn tur Community Investment Fund cheng nuai 15,541.09 chu VO/CLF-ah pek tawh a ni.