Minister-in Hachheka hnathawhte a tlawh

Sports & Youth Services (SYS) minister Robert Romawia Royte chuan nimin khan Mamit district-a infiamna kaihhnawih ruhrel siam mekte leh Zamuanga khuaa kuhva ro tawlh rûk endikna tura Hachhek kuhva chíngtute'n check gate an siam awm chilhtu police-te a tlawh.

Minister hian cheng nuai 4,400 sênna tur Mamit District Sports Complex te, cheng nuai 3,286 senna tur Mamit Residential Sports School te, cheng nuai 1,200 senna tur Mamit Mulitipurpose Indoor Stadium sak mek te, Dárlâk khuaa football khelmuala tui lut tur danna siam leh basketball court siam mek te, Kawrthaha volleyball court siam mek leh lighting system-te a tlawh a ni.

Réngdil khawtlang hruaitute leh GSA hruaitute'n a hranga Rengdila basketball court leh volleyball court siam lo a, semi indoor stadium-a integrated centre anga sak an duh thu an lo thlen chu Robert Romawia chuan tihpuitlin tum a nih thu a hrilh.

Sports Minister hian Zamuanga kuhva ro tawlh rûk endikna tura Hachhek kuhva chíngtute'n check gate an siama duty police-te chu dan phal loh thil tawlh rûkte veng tur leh man zêl tûrin a chah a; an ei leh in senso atan pawisa a pe bawk.