Siaha leh Lawngtlaiah ISHTH Campaign

Siaha leh Lawngtlai district-ah nimin khan Integrated STI, HIV, TB & Hepatitis (ISHTH) Campaign hawn a ni. Campaign hian June thla chhung a awh dawn.

ISHTH Campaign hawnna hi Siahaah chuan chief medical officer Dr Lalnunziri'n a kaihruai a, bawrhsap Lalhmunsanga khuallian a ni. Khuallian chuan, "Jail leh home hrang hrangah natna inkai chhâwn a awlsam bik a, Mizoram phei chu India rama jail táng natna inkai chhâwn theih vei tamna ber state kan ni mek," a ti a, campaign a hlawhtlin theih nan thawhhona ṭha a pawimawh thu a sawi.

Lawngtlaiah chuan additional DC Abraham Beirazi Khithie hoin campaign hawnna hun hman a ni. Lawngtlai district-a campaign chhungin a ṭul dan azirin sexually transmitted infections (STI), human immunodeficiency virus (HIV), tuberculosis (TB) leh Hepatitis enfiah bakah, health camp buatsaih tum a ni.

ISHTH Campaign-in a tum ber chu, district jail leh inkhung hranna home/centre hrang hranga awmte hnenah natna inkai chhâwn theih - STI, HIV, TB leh Hepatitis laka an fihlim theihna tura inven dan tur te, tih tur leh tih loh turte zirtir bakah, natna vei mekte enkawl dam a, mi dang an kai chhâwn lohna tura hmalakte a ni.

LAWNGTLAI DISTRICT DINHMUN
(STI, HIV, TB & Hepatitis)

▶ February 2021 aṭanga May 2023 chhungin district pumah HIV vei 355 hmuh chhuah an ni a; mipa puitling 225, hmeichhe puitling 117, mipa naupang panga leh hmeichhe naupang pariat an ni.

▶ HIV positive zinga mipa 11 chu an thi tawh.

▶ January-March 2023 chhungin ngawr (TB) veia rinhlelh endik mi 5,156 zinga mi 13-in TB an vei tih hmuh chhuah a ni a; TB vanga thi an la awm lo.

▶ Kum 2019 aṭanga kumin May chhungin Hepatitis-C rinhlelh endik mi 6,817 zingah Hepatitis vei finfiah mi 340 an awm.

▶ Hepatitis vei zingah enkawl dam tawh mi 213 awmin, enkawl mek mi 132 an awm a, treatment la miah lo mi 81 an awm.

▶ Hepatitis-B rinhlelh endik mi 6,731 zinga mi 182-in an vei tih hmuh chhuah a ni a, mi 31 chu enkawl dam an ni tawh.