END leh CADS-in heroin man

Excise & Narcotics department (END) mite leh Central YMA hnuaia Central Anti Drug Squad (CADS) mite chuan May 23, 2023 aṭanga June 6 thleng khan heroin kg. 3 leh gram 649 (hawng 286) an man.

END leh CADS mite hian May 27, 2023 khan zing dar 6:30 velah Zokhawthar-Aizawl inkara maxicab service aṭangin heroin gram 150 (hawng 11) an man a, hemi ni vek hian heroin kg. 1.387 (hawng 110) an man leh a ni.

Heroin an man chu chhui zuiin END chuan May 28 khan inhnam-hnawiha puh C Lalrinmawii (39) w/o Lalrinsanga, Kolasib Venglai East nia inchhál an man a, June 2 khan inhnamhnawih dang Ruthi Lalduhawmi (24) d/o Thangzauva, Vairengte Hall Veng leh John C Lalhmangaiha (28) s/o Lalramnghaka, Vairengte Kawngthar Veng nia inchhálte an man leh bawk.

END chuan thubuai an chhuina kal zelah June 6 khan Vairengte Kawngthar vengah heroin kg. 2.112 (hawng 165) an man belh leh a; he thubuaia heroin man zawng zawng chu kg. 3.649 (hawng 286) a tling.

Heroin vanga mante lakah The Narcotics Drugs & Psychotropic Substances Act, 1985 tlawhchhanin thubuai ziah luh a ni.