Raltlan zirlaite ngaihsak turin inchah

Mizoram Government Adhoc Aided School Teachers Union (MIGASTU) chuan thuchhuah siamin, Mizoram chhehvela tualchhung buaina avanga sahimna zawnga Zo hnahthlâk Mizorama lut zinga naupangte'n zirna an chhunzawm theih nan ngaihtuahna sénga beng chhi turin hmun hrang hranga an member sikulte an chah.

MIGASTU chuan, tun hnaia Mizoram chhehvela tualchhung buaina vanga chhungkaw tam takin Mizoram an rawn bèl leh, an zingah zirlai pawi sawi lo sang télin zirna chhunzawm thei loa harsatna an tâwk chu an lainat thu an tarlang a, "Mizorama rawn raltlan zirlaite’n zirna an chhunzawm theih dan ngaihtuaha Mizoram sorkarin a lo tuamhlàwm dante a ropui kan ti a, School Education changtu Pu Lalchhandama Ralte leh department-a official-te hmalakna chhuanawm kan ti tak zet," an ti.

MIGASTU chuan, Mizoram hmun hrang hranga an member sikulte chu ráltlân zirlaite tan harsatna siam lo tura chahin, "An zirna chhunzawm theih nana lo tuamhlâwmtu zinga kan tel ve thei hi kan lawm tak zet. Kan member sikulte hemi kawngah hian a theih anga harsatna tâwkte chhawmdawl zawnga ngaihtuahna sénga beng chhi zui zel turin kan inngen a ni," an ti a; zirna ṭha a awm theih nan leh mi thiam hman tlak chher chhuak turin sorkar an thlàwp tlat zel dawn thu an tarlang bawk.