KHAWTHLIR

Manipur ráltlân mi 10,091 awm mek

Manipur tualchhung buaina avangin sahimna zawnga Mizorama lut ni tin an awm belh zel a, Mizorama awm mek mi sing khat a tling ta. Nimin June 7 tlai dar 5 thleng khan mi 10,091 an awm a, June 6-a awm zat 9,682 aiin mi 409-in an tam zawk. District tina Manipur raltlan awm mek zat chu - Kolasib-ah mi 3,558, Aizawlah 3,537, Saitualah 2,420, Champhaiah 232, Mamitah 109, Khawzawlah 64, Lungleiah 63, Serchhipah 54, Siahaah 11 leh Hnahthialah pariat an ni.

Mizoram DGP-in 2nd MAP a tlawh

Director General of Police (DGP) Devesh Chandra Srivastva chuan nimin khan Lungleia 2nd Battalion MAP headquarters a tlawh. Recreation Hall-ah 2nd MAP headquarters-a awmte nen Sammelan an nei a; DGP chuan, sipaite'n harsatna an thlenah a theih ang anga hma a lak zel tur thu sawi.

Aizawlah Bru House

Mamit bialtu MLA Lalzirliana chuan tun hnai khan a bial chhunga Tuipuibari leh Rajivnagar khua leh a chhehvel khuate a tlawh a, chungkaw 21 hnenah puanṭhui khawl, pheikhawk chhe siamtu mi pahnih hnenah hmanrua leh mipui hnenah tarpauline leh infiamna hmanruate a hlan. MLA chuan, Mizoram sorkarin hnam tlem zawkte a ngai pawimawh thu leh Aizawlah Lai, Mara leh Chakma house-te a awm tawh a, Bru House din tumin sorkar hotute'n hma an lak mek thu a sawi.

Kuhva phurh khap

Lunglei additional DC Donny Lalruatsanga chuan Lunglei district-ah dan loa kuhva rah phurh khap a nih thu a tarlang a, "Mizoram hmun ṭhenkhatah dan loa ram páwn aṭanga kuhva phurh luh a ni ṭhin tih hriat a ni a, dan bawhchhiatna a nih bakah kawng a tichhe nasa hle bawk," a ti. Thupek zâwm lote chu IPC Section 188 hmanga hrem theih a nih thu a tarlang.