Chanchin thehdarh hmasatu nih aiin thu rintlak thehdarh a ṭul - IPR Minister

Information & Public Relations minister Lalruatkima chuan, Youtube-ah fimkhur lehzual a ngaih thu sawiin, Mizo ṭawng dik hman a ṭul thu leh chanchin thar thehdarh hmasatu nih aiin thu belhchian dâwl leh rintlak thehdarh a ṭul thu a sawi.

IPR department leh Information & Communication Technology department chuan nimin khan IPR auditorium-ah 'Media Workshop on Youtubers & Related Media' an buatsaih a; IPR minister Lalruatkima khuallian niin, Youtube leh a kaihhnawih media-a inhmangte an tel a ni.

Lalruatkima chuan, social media chu mi tam takin eizawnna atan an hmang tih sawiin, "Mizoramah social media channel subscribe-tu tam tak an awm a, an thu leh hlate'n nasa takin mi rilru leh ngaihtuahna a nghawng thei a, chuvangin fimkhur lehzual a ngai em em. Chanchin thar thehdarh hmasatu nih a châkawm ṭhin a, chutih rual chuan, thu belhchian dâwl leh rintlak ngaihchan phawt a ṭul ṭhin," a ti.

IPR Minister chuan, media lama sorkarin inkaihhruaina leh dan a zam zawm a ṭul thu sawiin, "Journalist-te inkaihhruaina dan awm sate hi kan zawm hian kan him bakah, mi dangte tan pawh malsawmna thlentu kan ni zawk ṭhin," a ti a; mi dang nun khawih chhe vek thei thilte leh ṭhalai rilru a ni lo záwnga hruai kâwi thei thilte thliar thiam a pawimawh thu a sawi.

Lalruatkima chuan, thu belhchian dâwl lo thehdarhin nghawng pawi tak a nei thei tih sawiin, "Vawi khat mi kan va hriattir a, kan va hmuhtir khan an rilruah a ṭha zawng leh ṭha lo zawnga a kaihhruai theih avangin kan fimkhur a ngai a, khawtlang tipumkhat leh ṭangrual tur zawnga hma kan lak a ngai hle," a ti.

Youtube leh social media dangte chu Mizo ṭawng tihhmasawn nan hman ni se a duh thu sawiin Minister chuan, "Tun hma deuh khan social media-ah Mizo ṭawng dik lo a tam em em a, Youtube-ah pawh Mizo ṭawng lam rîk dan dik tâwk lote a awm ṭhin. Social media-te hi Mizo ṭawng tihhmasawnna atan hmang tura ṭan lak zel a ngai," a ti.

IPR Minister chuan, chanchinbu lamin sorkar hriatpui leh pawmpuina accredited journalist an neih thu a sawi a, accredited youtuber emaw, chutiang lam thil han dahte pawh thil àwm tak a nihna chen a awm thu leh dante pawh la her rem zel a la ngaih theih thu a sawi bawk.

Workshop hi IPR director C Lalnunkima'n a kaihruai a, Mizo Youtubers’ Association aiawhte leh youtuber dangte bakah, political party hrang hranga media lam khawihtu te, tlawmngai pawl leh media lam buaipuitute an tel. ICT chief information officer Dr Lalthlamuana pawhin thu a sawi.

Chawhnuah thupui hrang hrang zirho a ni a; MPF secretary Prof. Malsawmliana'n 'Politics boruak ṭha thlen tura social media pawimawhna' tih a sawi a, AIR news editor Irene Lalruatkimi'n 'Social media hmangtute mawhphurhna' tih a sawi. ICT informatic officer Lalengzuala'n 'Social media ṭhatna leh chhiatna Mizote hmasawnna atan' tih a sawi a, CID (Crime) additional SP Zonun Sanga'n 'Social media kaihhnawih dan pawimawhte' tih an sawi bawk.