MNF hi a chhe lai siam ṭhatu ni loin, a ṭha lai siam chhetu a ni - Zodintluanga
Congress Legislature Party leader Zodintluanga Ralte chuan nimin khan Marpara-a YCA Hall-a vantlang inkhawmah thu sawiin, MNF sorkar chu a chhe lai siam ṭhatu ni loin, a ṭha lai siam chhetu a nih thu a sawi a; SEDP sem chu tlâkranna a nih thu a sawi bawk.
Thorang bialtu MLA Zodintluanga chuan, sorkar term kal mek chhungin Thorang biala khaw hrang hranga Congress sorkar laia hmalak tawhte leh hmalak zui ngai tam tak an hnutchhiahte chu MNF sorkarin an enkawl zui loh avangin hman tlâk loh ṭáwl ta tam tak a awm tawh thu a sawi a, "Pu Zoramthanga kaihhruai MNF sorkar hi a chhe lai siam ṭhatu ni loin, a ṭha lai siam chhetu a ni," a ti.
Zodintluanga Ralte chuan SEDP chungchang sawiin, "SEDP hi tlâkranna tur kawng khat, awmze nei loa mipui sum khawhralna mai mai a ni. Rs 25,000 an sem mek hian awmzia a nei lo a, a dawngtute'n eng atana hman tur nge an hre lo a, mipui dinhmun chawi kân tumna aiin, an party mi leh sate sawh ngheh nan leh an party-a mi thlêm luh nan an hmang mek a ni," a ti a; SEDP hnuaia sum an sem chu mipui sum a nih thu a sawi.
Zodintluanga Ralte chuan, "Thorang biala khua zawng zawng deuh thawa inkalpawhna kawng Congress sorkarin a laih tlang vek tawh pawh MNF sorkar hian chei ṭhat leh enkawl zui a tum loh avangin fûrpui thleng tur lo hmachhawn a huphurhawm zual hle dawn a ni," a ti.
Thorang biala MNF sorkarin hma an lakna awm chhunte'n a rilru a tihnat thu sawiin Zodintluanga chuan, "Sum siamna atan chauha Thorang bial hmang duhtute hi kan hnâwl a ngai. MNF sorkar hian Thorang bial mai ni lo, Mizoram hi an hmangaih tak tak lohzia mipui hian kan hmu chiang tawh a ni," a ti.
ZPM chungchang sawiin CLP Leader chuan, "ZPM hi baloon lian taka ham puar ang an ni. Inthlan hmain a keh ṭan a, an hruaitu lawkte'n lamṭang MLA candidate tur an inzawn siak mek a, bial tin deuh thawah candidate tur pathum/pali an sáwm a, buai chinfel tur an ngah hle a ni," a ti a; Congress party chu Mizoram hmasawnna thlen theitu awm chhun niin a sawi bawk.