MNF sorkar aia huaisen Mizoramin a la nei lo - MNYF

Mizo National Youth Front (MNYF) hruaitute chuan nimin khan Aizawl Press Club-ah thuthar theh­­­darhtute an kâwm a; Mizoram leh hnam hum­him turin MNF sorkar aia huai­sen leh chak Mizo­ramin a la nei lo niin an sawi.

MNYF vice president Zodinpuia chuan, MNF sorkar aia ram leh hnam humhim tura huaisen leh chak Mizoramah an awm lo nia sawiin, "Chief minister Pu Zoramthanga huaisenna avangin Assam-in hun rei tak an lo ta neih tawh ṭhin ramte harsatna awm loin Mizoram chuan kan cheibáwl thei ta. Tripura nen kan ramriah pawh Mizoram sorkarin huaisen takin hma a la a, Zampuiah VC thar pawh MNF sorkar chuan a pe tawh," a ti.

Mizoram leh a chhehvela Zo hnahthlakte’n hun harsa an hmachhawn laiin CM Zoramthanga leh MNF sorkar chu Zoram mipui leh Zo hnahthlakte tan nghet takin a ding a, hniak khat pawh a la hnungtawlh lo nia sawiin Zodinpuia chuan, Manipur Zo hnahthlak unaute tana Zoramthanga hmalakna avanga a thlalak Meitei hoin an hâl chu Zoramthanga ropuizia lannaa an ngaih thu a sawi.

MNYF Vice President chuan, Manipur-a Zo hnahthlakte’n inrêlbâwlna hran an phût chu MNF-in an thlàwp thu sawiin, "Manipur-a Zo hnahthlak MLA 10-te'n inrêlbàwlna hran phûta hma an lakna hi MNF chuan a thláwp a, kan unaute himna turin theihtawpin ke a pên zel dawn," a ti.

MNYF hruaitute chuan, Zo fate inpumkhat nan MNF sorkarin state hrang hrangah ‘Zofate Inpumkhatna Kût’ a buatsaih tawh thu te, Aizawl leh Behliangchhip, Tripura inkarah bus tlantir a nih thu te, Tahan, Muanmar leh Manipur-ah pawh bus tlantir tura hmalak a nih thute an sawi bawk.

MNYF TARLAN DANGTE

■ Mizoramah Manipur ráltlân mi 10,091 an awm a; Mznipur-ah Mizoram sorkarin buhfai ip 9,552 a thawn tawh.

■ Mizoramah Bangladesh aṭangin ráltlân Lawngtlai district-ah mi 773 an awm mek.

■ Mizoramah Myanmar aṭangin ráltlân mi 34,278 an awm mek.