Health Minister-in damdawi-in a hawng

Health minister Dr R Lalthangliana chuan nimin khan Lawngtlai District Hospital a tlawh a, Chief Medical Officer conference hall-ah thawktute nen an inkâwm a; Ṭawipui South Primary Health Centre (PHC) sak thar a hawng bawk.

Lawngtlai District Hospital a tlawhnaah Health Minister chuan damdawi-in chu fang kualin a enfiah a; medical superintendent Dr Beiparysa K hoin thawktute'n an dinhmun, mamawh leh harsatnate a lo hrilh a, HFW department hotute leh DHL-a thawktute nen damdawi-in tihchangtlun dan tur an sawiho.

Dr R Lalthangliana chuan, hriselna lamah Lawngtlai district-ah hmasawnna tam tak a awm laiin, ṭan lâk ngaihna lai eng emaw zat a awm thu a sawi a, "Mizoram hi India rama malaria hluarna state zinga mi a ni a, Lunglei, Lawngtlai leh Mamit district-te hi sikserh hluarna a ni. Heng district pathumah hian malaria donaah ngawrh zawka hmalak tum a ni," a ti.

Ṭawipui South PHC sak thar a hawnnaah Health Minister chuan, "Sorkarin mipui hriselna a ngai pawimawh a, hmun hrang hrangah damdawi-in, PHC, health & wellness centre, sub-centre, clinic, office leh thawktu quarters eng emaw zat sak zawh tawh a ni," a ti a; sub-centre eng emaw zat chu health & wellness centre-ah hlàn kai a nih thu a sawi.

Ṭawipui South PHC hi NABARD Rural Infrastructure Development Fund-XXVI aṭanga hmuh cheng nuai 267.15 hmanga sak a ni.