MZU-ah seminar chi hnih buatsaih

Mizoram University-a Department of Psychology leh Global Forum for Sustainable Rural Development-te ṭang dun chuan nimin aṭang khan 'Advancing Sustainable Development Goals: Promoting Health, Well Being and Gender Equality' tih thupui hmangin international seminar an buatsaih a; MZU Department of Political Science pawhin 'India and G20: Setting a Global Agenda' tih thupui hmangin national seminar an buatsaih ṭan bawk.

Seminar chi hnih hi ni hnih awm tur ve ve a ni a; 'Advancing Sustainable Development Goals: Promoting Health, Well Being and Gender Equality' tih thupui hmanga international seminar-ah hian MZU vice chancellor Prof. Debakar Chandra Deka khuallian niin, sorkar laipuia Panchayati Raj secretary hlui Meenakshi Dutta Ghosh khualzahawm a ni.

Vawiin hian slenary session neih a ni dawn a; United Kingdom, Oman, Ghana, Afghanistan, Cameroon, Nigeria, Bangladesh leh Thailand aṭanga mithiam rawn telte'n thu an sawi dawn a; mi 80 velin online leh offline hmangin research paper an sawi bawk ang.

'India and G20: Setting a Global Agenda' tih thupui hmanga national seminar buatsaih hawnna chu Environment, Forest and Climate Change minister TJ Lalnuntluanga'n a hmanpui. Minister chuan, seminar chhimtu mithiamte chu hlâwk taka hmang turin duhsakna a hlan a ni.

National seminar hi session hrang hrangah ṭhen a ni a, 'G20 and India: Soft Powers & Local Actors' tih te, 'Sustainable Development Goals and G20' tihte leh 'India's Foreign Policy Issues and G20' tihte a ni. MZU, ICFAI University Aizawl, North Eastern Hill University, Shillong leh Vidyasagar University, West Bengal-a mithiam resource person atana ruatte'n thupui an sawi dawn a ni.