PUC-in NIRF ranking 34-na an lawm
National Institutional Ranking Framework (NIRF)-in tun hnaia ranking a tihchhuaha India rama college ṭha 34-naa Pachhunga University College (PUC) a puan chu PUC chuan nimin khan an seminar hall-ah an lawm a, ni hnih awh tur 'Sustaining Nature & Tribal Worldview: An ecocritical approach to Literature' tih hmangin international symposium an buatsaih. He hun hi Governor Dr Hari Babu Kambhampati-a'n a hmanpui.
Governor chuan, PUC hlawhtlinna chu Mizoram tana inchhuanna tham a ni thu leh thinlung taka a lawmpui thu sawiin, dinhmun sang tak an thlen theihna tura theihtawp chhuahtu zawng zawng lawmpuina a hlàn a; PUC-in hlawhtlinna lawmna atana international symposium an huaihawt chu inhmeh a tih thu a sawi.
PUC-in awmze nei leh tum chiang taka neia hma lam an pan zel chuan India rama college ṭha filawr a la nih theih a rin thu sawiin, "Nakin lawkah deemed university dinhmun pawh an la chan a beiseiawm hle a ni," a ti a; National Education Policy 2020 hmathlir anga PUC an kal zel a nih chuan teaching intensive and research intensive university a la nih thuai a rin thu a sawi bawk.
NIRF-in tun hnaia India rama zirna-in sangte ṭhat dan tehna (ranking) a tihchhuahah PUC hi India rama college zingah 34-na a ni a, nikumah 45-na niin, hma a sawn zel a ni. Hetih lai hian, India hmarchhak state-a college dang zingah top 100-a lang pha an awm lo. PUC-ah hian arts, science, commerce leh management-ah department 23 a awmin, zirlai 3,000 chuang an awm mek a, NAAC A+ grade a ni.
PUC ranking lawmnaah hian principal Prof. H Lalthanzara pawhin thu a sawi a; symposium-ah hian mithiamte'n thupui an sawi.