Champhaiah NDPS Act zirho a ni

Mizoram State Legal Services Authority (MSLSA) chuan nimin khan Champhai Venglai Community Hall-ah ruihhlo dona dan, Narcotic Drugs and Psychotropic Substances Act, 1985 (NDPS Act) zirhona an buatsaih a, SLSA member secretary Vanlalena'n a hmanpui.

Zirhona hi Champhai additional district & sessions judge Sylvie Z Ralte-in a kaihruai a; ruihhlo tawlh rutute chu lung-ina an tàn piah lamah, dan loa an sum lak luh aṭanga in leh lo an lo dinte laksak theihna kalpui ṭan mek a nih thu tarlan a ni.

Khuallian Vanlalena chuan, ruihhlo vangin ṭhalai, a bikin mipate an thih tam thu sawiin, "Ruihhlo kaihhnawiha sumdawnna rawn hluar tur ben daih hi kan hnam humhalhna atana thil pawimawh tak a ni," a ti.

Vanlalena chuan, ruihhlo vanga sumdawng mante hrem kawngah a mantute leh hriatpuitute an pawimawh thu a sawi a, ruihhlo tawlhtute dan anga hrem an nih theih nan NDPS Act chu a mantute mai ni loin, thuhretu (witness)-a ṭang ṭhinte leh pawlte'n an hriat chian a ṭul a sawi bawk.

Champhai SP Lalrinpuia Varte pawhin thu sawiin, ruihhlo tawlh rutute lakah dimna tel loa hmalak a ṭul thu a sawi a, "A hremna hnuaiah lung-in an tàn piah lamah, dan loa an sum lak luh aṭanga in leh lo an lo dinte laksak theihna chu police-in kan kalpui ṭan mek. Hemi kawngah hian khawtlang leh tlawmngai pawl hruaitute puihna kan mamawh," a ti.

Zirhonaah hian Champhaia tlawmngai pawl, home/centre enkawltute, thuthar thehdarhtute, Mizoram Police leh Excise & Narcotics department aiawhte an tel a ni.