MLA-in Manipur panna kawng a enfiah

MLA Dr L Thang-mawia chuan nimin khan Mizoram aṭanga Daido kaltlanga Manipur state panna kawng siam ṭhat mek chu Manipur ramri Vawngkawt thleng a tlawh a, adviser to chief minister (technical) K Lalsawmvela leh PWD SDO H Lalrinfela ten an ṭawiawm.

Dr L Thangmawia chuan, Daido kaltlanga Manipur panna kawng chu lui kân ngai loa Manipur kal theihna awm chhun a nih thu sawiin, "CM Pu Zoramthanga'n a ngai pawimawh hle a, kawng siamna tur hian NEC aṭangin cheng vbc. 33 a dil chhuak tawh a, tihfel ngai a la awm nual avangin sum hman theih a la ni rih lo. Manipur buaina avangin he kawng hi hman a ṭul a, kawng hlui awm sa hmanhmawh taka cheina tur sum CM-in zawngin, kumin fûr laia motor tlân theih nan June 7, 2023 aṭang khan siam ṭan a ni," a ti.

MLA-in kawngah hian Mizoram chhungah thawm ṭhat hmanhmawh ngai bik km. 3.15 a awm a; Manipur lamah chuan state ramri thlengin kum 2021 khan laih tlang a ni tawh a ni.

K Lalsawmvela chuan, Manipur panna kawng dang, NH-102B-a Tuivai lei hlui foundation siamṭhat hna May 2023 khan zawh a nih tawh thu a sawi a, "NH-150 (Tipaimuk Road)-a Tuivai lei pawh tunah hian lei hluihlâwn tawh châkte la khawmin siam tura hmalak mek a ni bawk," a ti.