KHAWTHLIR

Manipur ráltlân 10,091 awm mek

Manipur tualchhung buaina avangin sahimna zawnga Mizorama lut ni tin an awm belh zel a, nimin khan darkar 24 chhungin 61-in an pun belh. Nimin June 8 tlai dar 5 thleng khan Manipur ráltlân mi 10,152 an awm a, June 7-a awm zat 61-in an tam zawk. District tina Manipur ráltlân awm mek zat chu - Kolasib-ah mi 3,608, Aizawlah 3,535, Saitualah 2,445, Champhaiah 240, Mamitah 109, Khawzawlah 79, Lungleiah 63, Serchhipah 54, Siahaah 11 leh Hnahthialah pariat an ni.

J Buana College

J Buana College, Lunglei chuan nimin khan an zirlai kal chhuakte thlahna, Valedictory Day an hmang a, minister C Lalrinsanga leh Lawmawma Tochhawng, MLA ten an hmanpui. Minister chuan, sorkar hna atan an rilru zawng zawng pe lo turin zirlaite a chah. J Buana College-ah hian zirtirtu 48-in zirlai 500 chuang an enkawl mek a ni.

Lei zawh khap

Mamit SP Lalthangpuii Pulamte chuan, Bairabi-Zamuang kawnga Teirei lei (bridge) chu a inngahna lei a min avangin lirthei zawh khap a nih thu a puang. Thupek zâwm lote chu MV Act Section 179 hmanga hrem theih an nih tur thu a tarlang bawk.

Police-in ganja man

Saitual Police chuan June 7, Nilaini zing khan Khawlian khuaah Saitual taxi MZ-01 H-4784 aṭangin ganja kg. 10.75 an man a, taxi khalhtu Lalrempuia (38) leh Lalnunkima (26), Keifang Vengthar nia inchhál ve ve an man nghal. An lakah hian Saitual Police Station-ah NDPS Act tlawhchhanin thubuai ziah luh a ni.

BLO training

Siaha district election officer Lalhmunsanga Hnamte, bawrhsap hoin nimin khan DRDO conference hall-ah block level officer (BLO)-te pualin 2nd Special Summary Revision tan training neih a ni a; BLO-te mawhphurhna leh hriat tur pawimawhte sawiho a ni.

Khawzawlah zirhona

Khawzawl district Samagra Shiksha leh Evangelical Teachers' Fellowship, Mizoram ṭangkawp chuan nimin khan Khawzawl Zaingen YMA Hall-ah Khawzawl district-a sikul hrang hranga School Management Committee leh School Management & Development Committee-te tan Social Transformation through Education training an buatsaih a, SMC leh SMDC member 360 vel an tel.