Sum leh paia bum tâwkte Police hriattir turin chah

Mizoram Police Media Cell chuan, internet leh online hmanga inbumna zingah pawisaa inbumna a hluar thu an tarlang a; inbumna tâwkte chu www.cybercrime.gov.in-ah emaw, NCRP Helpline number 1930-ah emaw, Aizawl Cyber Crime PS number 8119935420 / 0389-2320416-ah emaw hriattir vat turin an chah.

Police Media Cell chuan, internet (online) hmanga inbumna a hluar chak thu tarlangin, "Mizoram bikah chuan cyber-crime zingah sum leh paia inbumna a hluar ber a, complaint dawn zawng zawng zinga 75% chu hetiang chi inbumna hi a ni," an ti.

Cyber Crime Police Station tarlan danin, "Cyber Crime PS din tirh May 2020 aṭangin pawisaa inbumna (defrauded money)-ah Rs 24,31,455 hmuh lêt a ni tawh a, a neitu dik takte hnenah pek lêt a ni. Bungraw chah, a man pek lâwk tawh, bungraw thleng thei lo ang chi-ah Rs 16,00,000 hû bungrua hmuh lêt a ni tawh.

National Cybercrime Reporting Portal (NCRP) hmanga mipuiin Mizoram Police hnena complaint an thehluh bawhzuinaah inbumna pawisa Rs 11,05,018 chu bank chi hrang hrangah khawih chêt theih loha dah a ni tawh bawk.