Green Mizoram Day hman a ni : 'Thing phun ila, enkawl zui ang u'

Nimin khan Mizoram hmun hrang hrangah Green Mizoram Day hman a ni a, thupui chu 'Thing phun ila, enkawl zui ang u' tih a ni. Aizawlah chuan chief minister Zoramthanga hoin Sihphir Kawnvenga Rohrenga Hall-ah hman a ni a, Chief Minister chuan, thing phun tur thlan uluk leh thing phunte enkawl zui a pawimawh thu a sawi.

Green Mizoram Day hi Environment, Forest & Climate Change (EFCC) department buatsaihin hman a ni a; Aizawla a hmanna inkhawm hi PCCF RK Singh-a'n a kaihruai a, EFCC minister TJ Lalnuntluanga, MLA Ramthanmawia leh Padma Shree dawngtu KC Runremsangi te pawhin an hmanpui.

Green Mizoram Day hi June 11-ah hman ṭhin a ni a, kuminah chuan Pathianni a nih avangin nimin khan hman a ni. Nimina Day hmannaah hian ram kâng tur veng ṭha lawmman leh ram kâng venna awareness video clip insiamsiak lawmman sem a ni a; inkhawm zawhah Sakawrhmuituai tlangah Tlaizawng, Vaube, Kuangthlí leh Ngiau ṭiakte phun a ni.

CM Zoramthanga chuan, thing phunah chauh duh tâwk loa enkawl zui zel a ṭul thu sawiin, "Ram ṭhang zelah kan thing phunte hi a hmun azirin uluk a pawimawh. Khawpui chhung leh mihring chenna hnaiha phun leh ramhnuaia phun turte thlan uluk a ṭul a, enkawl zui zel pawh a awlsam phah ang," a ti.

Hmasawnna leh ramngaw humhalhna chu kal kawptir thiam a ngai tih sawiin Zoramthanga chuan, "Economy hmasawnna leh environment humhalhna hi thil tam taka inhal anga ngaih theihna lai awm mah se, ngaihtuahna uluk taka séngin kal kawp dan zawn zel theih a pawimawh. Green Mizoram Day puala thing kan phunte hi ṭha taka enkawl zuia, humhalh a nih a, Mizoram hring zawk, mawi zawk leh nuam zawk kan neih theihna tura rahbi pawimawh tak a nih ka beisei," a ti a; environment ṭhatna tur leh economy tihhmasawnna tur ngaihven kawp a pawimawh thu a sawi bawk.

EFCC minister TJ Lalnuntluanga pawhin thu sawiin, "Environment humhalh kawnga sorkar hma­laknate hi hlawhtling tur chuan mipui ṭawiawmna a ṭul. Green Mizoram Day kalpui ṭhin danah pawh hmasawn zel tum a ni," a ti a; Central Nursery-ah thing ṭiak 2,00,000 vel lak tur a awm thu leh nursery dangte pawh thuam ṭhat mek a nih thu a sawi.

Green Mizoram Day hi Mizoram hmun hrang hrangah hman a ni a, district tin leh hmun dang dangah hman a nih bakah, pawl eng emaw zatin an hmang a, thing eng emaw zat phun a ni.

Lunglei

Lungleiah chuan Pukpui Centenary hmunah hman a ni a, MLA Dr K Pachhunga'n a hmanpui. Lungleia sorkar department hrang hrang, VC leh NGO-te'n Lunglei leh Mausen inkar kawngpui dungah thing ṭiak 395 an phun. Lunglei district-a kângmei laka invênna lama hma la ṭha khuate hnenah lawmman sem a ni a - hma la ṭha ber chu Ṭawipui South khua niin, Rs 50,000 hlan a ni.

Siaha

Siahaah chuan MADC Forest Hall-ah MADC executive member (EFCC) Tiahlei Syuhlô hoin hman a ni a, thing ṭiak 1,100 vel an phun. Kângmei veng ṭha ber Theiva khua hnenah lawmman Rs 50,000 hlan a ni a, chanchinbu zingah kângmei chungchanga mipui hnena zirtirna chhuah ṭha Kawl Eng hnenah Rs 3,000 hlan a ni.

Siaha district-ah kumin chhungin ram kâng vawi 214 a awm a, ram hectare 136-a zau leh reserved forest hectare 0.9-a zau a kâng chhia. Kuminah MADC-a EFCC department chuan thing 6,300 a phun tawh a ni.

Champhai

Chamhaiah chuan DC James Lalrinchhana hoin Nagar Van (Urban Forest)-ah hman a ni a; Nagar Van (Urban Forest) Champhai Zote leh LAD ram, New Champhaiah thing 1,940 vel an phun. Kângmei veng ṭha bera thlan Leithum khua hnenah Rs 50,000 hlan a ni a, chanchinbu hma la ṭha bera thlan Pasalṭha hnenah Rs 3,000 hlan a ni. Green Mizoram Day 2022-a thing phunte vil chhunzawmtu ṭha bera thlan Excise & Narcotics department hnenah Rs 5,000 hlan a ni bawk.

Kolasib

Kolasib-ah chuan Excise & Narcotics Complex, Khuang­puilamah DC John LT Sanga kaihhruaiin hman a ni a, MLA K Laldawngliana'n a hmanpui. END Complex-ah thing pasarih leh Thingdawl BDO compound-ah thing 162 phun a ni a, a duh apiang tan thing phun tur 10,000 ruahman a ni. Ram kâng tur veng ṭha bera thlan Bairabi North VC hnenah Rs 50,000 hlan a ni.

Serchhip

Serchhipah chuan DC Nazuk Kumar hoin DC conference hall-ah hman a ni a, sorkar department-te leh tlawmngai pawlte'n Khawtetlangah thing phun hnatlang an nei nghal. Serchhip district-a kângmei veng ṭha bera thlan Khawbel hnenah lawmman hlan a ni a; ramngaw humhalh tura intiamna thu an sawi rual bawk.

Lawngtlai

Lawngtlaiah chuan additional DC Abraham Beirazi Khithie hoin hman a ni a; sorkar department, zirna-in, MJA leh tlawmngai pawl hrang hrangin Kaladan Multi Modal Transit Transport Project kawngpui sirah thing ṭiak 380 an phun. Village Level Fire Prevention Award-ah Thaltlang khua pakhatna niin, Rs 50,000 hlan a ni.

Mamit

Mamitah chuan bawrhsap VL Remliana'n hoin Luangpawlah Green Mizoram Day an hmang a, sorkar pisa hrang hrang bakah, pawl leh khawtlang hruaitute'n thing ṭiak 207 an phun. Kângmei veng ṭha bera thlan Rawpuichhip hnenah Rs 50,000 hlan a ni.

Raj Bhavan

Governor Dr Hari Babu Kambhampati leh a nupui Dr Jayashree Kambhampati hoin Raj Bhavan-a thawkte'n Green Mizoram Day pualin Raj Bhavan-a Circular Lawn sírah theihai ṭiak an phun a; Larsap chuan, "Khua leh tui zawng zawngte chu kum tin, kum khatah thing ṭiak pakhat tal emaw, a aia tam emaw phun ziah turin ka ngen a ni," a ti.

State NSS
State NSS chuan Green Mizoram Day pualin nimin khan DamdiailehHmuifang inkarah thing ṭiak 200 chuang an phun bakah, kum hmasa lama thing an phun tawhte hmunhma sàm fai hnatlang an huaihawt a, Aizawla NSS leh zirna-in hrang hranga NSS volunteer-te an thawk chhuak. Aizawl pawn lam NSS unit-te'n an remchan danin thing pun hnatlang an nei bawk.

Zoram Medical College

Zoram Medical College chuan an academic building-ah Green Mizoram Day an hmang a, Aizawl South-III bialtu MLA Prof. F Lalnunmawia'n a hmanpui. ZMC zirtirtu te, zirlaite leh thawk dangte bakah, Falkawn VC-te'n ZMC ram chhungah thing ṭiak 70 an phun a ni.

SRDC & HRDB

Sialkal Range Development Council leh Human Resource Development Board-a thawkte chuan Green Mizoram Day pualin Reiek lama Tlawng kawngah thing phun hnatlang an nei a, SRDC chairman leh HRDB vice chairman Dr L Thangmawia, MLA-in a hmanpui a ni.