Governor-in Mizoram luia kawlphetha siam theih zat zir chian thuai a duh

Governor Dr Hari Babu Kambhampati chuan nimin khan Raj Bhavan-ah Power & Electricity (PE) department leh Ministry of Jal Shakti hnuaia Central Water Commission (CWC) hotute a kâwm a, a rang lama Mizoram lui aṭanga kawlphetha siam chhuah theih zat dik tak zir chian dan tur a sawipui.

Governor chuan, Mizorama kawlphetha siam chhuah chung­changah Prime Minister a hmuh tawh thu a sawi a, "Prime Minister chuan Mizoram PE department-in Prime Minister Office-ah presentation an pek a remti a, Mizoram sorkarin PMO-a presentation kan pek hmain kawlphetha kan siam chhuah theih zat chiang zawka zir chian a ngai a ni," a ti.

Zirchianna (survey & investigation) hi CWC leh PE department-ten an neih tawh angin statistics neih a ngai nia a hriat thu sawiin Larsap chuan, "Statistics inang khat leh rintlak a rang lama neih a nih theih nan information in neih angte inpe tawnin, thawkho ang che u," a ti.

Prime Minister hnena thlen tur ruahmana siam a nih dawnin Cen­tral Electricity Authority of India-te nen sawiho hmasak bakah, an ngaih­dan lak hmasak ṭha a tih thu Larsap chuan a sawi bawk.

Inkawmhonaah hian PE secretary H Lalengmawia hoin PE department engineer te, CWC superintending engineer Preeti Choudhary leh CWC hotu dangte an tel a ni.