Hun harsa tâwk ṭhin mah ila, kan sorkar leh ngei ang - Zorama

MNF president Zoramthanga chuan, kumin 2023 kum tàwp lama Mizoram inthlanpuiah Hachhek biala MNF candidate tur chu Robert Romawia Royte a nih thu June 8, Thawhlehni khan Lallianmawia Pachuau Hall, Zawlnuam Bawrai-a MNF Hachhek Joint Block Meet-ah a puang a, "Hun harsa chi hrang hrang tâwk ṭhin mah ila, kan sorkar leh ngei ang tih kan ring," a ti.

Zoramthanga chuan, "Khawvelin Mizo hnam min hriatna chu hnam thinlung kan put vang a ni. Mizoram chauh ni lo, hmun hrang hranga Zo hnahthlakten Mizo nationalism kan tuipui a, hei hi kan vawn nun zel a pawimawh em em," a ti a; Hachhek bial chu ramri hrûla awm leh eptu MLA bial a ni chungin hmasawnna tam tak a awm tih sawiin, MNF an sorkar leh ngei theih nan insang mara theihtawpa ṭan la turin Hachhek bial mipui a fuih.

MNF pary chu kum 60 chhung Pathianin a hruai tawh tih sawiin Zoramthanga chuan, "Zo hnahthlak unau hmun hrang hranga awmte'n MNF sorkar an thlamuanpui thu an sawi a, hun harsa chi hrang hrang tâwk ṭhin mah ila, kan sorkar leh ngei ang tih kan ring a ni," a ti a; MNF policy - Zo fate inpumkhatna leh rorelna pakhat hnuaia awm tih chu tun thlengin MNF party dinna a la nih thu a sawi.

MNF adviser leh Hachhek biala MNF candidate tura thlan Robert Romawia Royte pawhin thu sawiin, "Hachhek bial khaw hrang hrangah hmasawnna thar kan nei tam hle a, lawmthu i sawi ang u," a ti.

Zoramthanga hian MNF party zawm thar mi 1,391 a lawm lut niin MNF thuchhuah chuan a tarlang.