KS Thanga Congress aṭangin a báng
Kum 2013-2018 inkara Lal Thanhawla kaihhruai Mizoram sorkara minister ni ṭhin leh Mizoram Pradesh Congress Committee-a hruaitu KS Thanga chuan nimin chhun khan Congress party aṭanga bànna MPCC president Lalsawta hnenah a thehlut.
KS Thanga rual hian MPCC secretary pahnih - R Vanlalruata leh Seventha Chawngthu te, MPCC state organiser pahnih - C Lalhmunliana leh ZD Lalfinga te, MPYCC hruaitu pakhat leh block president pakhatin bànna an thehlut bawk.
KS Thanga chuan, kum 30 dáwn lai Congress party-ah a awm tawh tih ziakin, tuna MPCC President hnuaia thil awm dan thlirin, inhûikhawm lam aiin inṭhendarhna lam kawng an zawh tâk zel thu a tarlang a, "Congress party president ni tura bul i ṭan dan han chhût hian ram rorel tak tak tura Pathian malsawmna dawng tlak i ni hian ka hre thei lo. Chuvangin, chhan hrang hrang avangin MPCC-a ka nihnate bànsanin party ka chhuahsan a ni," a ti.
KS Thanga hian Congress party a bànsan chhan point pasarih a ziak a; MPCC president Lalsawta chu minister a nih laiin a remtihna thlapin a pawisa tur mi tute emaw a lo dilsak a, pawisa chu a hnenah an dah tih sawiin, "Luangmuala ka in aṭangin sorkar motor-in i PSO leh driver rawn hruaiin nangmah ngeiin i rawn la thlap a, i hâwn ta a ni. I inah pawisa kha i hriat lohin tu mahin an dah lo," a ti.
KS Thanga chuan MPCC president Lal Thanhawla a bànna tura nasa taka hma laah Lalsawta a puh a, "Pu Lal Thanhawla paih thlâk tumin hma i la ngar ngar a. Aizawl hmun hrang hrangah vawi tam meeting i hoa neih ṭhin a ni a, ka in ngeiah pawh mi in rawn dil angin zanriahte ka lo buatsaih a, meeting pawh neih a ni. Khatianga inkoh khawm ṭhinna ah khan Pu Hawla paih thlak tumin ruahmanna chi hrang hrang i siam," a ti. Signature campaign huaihawtah puhin, chutah chuan mi 50 laiin hming an ziah thu leh Congress hmangaih vangin Lal Thanhawla chu a bàng ta niin a tarlang.
KS Thanga chuan Lalsawta chu mahni thianghlim anga inchhuah tumah puhin, "Party dangin Congress sorkar kal tawh min bei a... Beih lêt i duh hauh lo a, nangmah chauh mi ṭha anga intarlan i tum avangin i thawhpui ex-minister-te thlavâng hauh i phal miah lo. Hei hi nangmah chauh lan mawi i tumna, bawlhhlawh leh zahpuiawm tak a ni," a ti a; Lalsawta chu Lal Thanhawla'n term nga a lo kaihhruai tawh sorkar chhe lailet dêra tlangthantirah a puh.
Lalsawta chu Lal Thanhawla'n Congress party a lo kaihhruai tawhna kalh zawnga kalpui ngat ngatah puhin, "NLUP sem duh loh thute sawi chhuak hmasatu i ni nghal a. Tunah i naute'n campaign a harsa an tih avangin Ṭang Puihna Rs 2,00,000 i tiam leh ta mai si a. Hei hian principle mumal tak neia party i kaihhruai lohzia chiang takin a tilang," a ti.
KS Thanga chuan Lalsawta hi Congress constitution palzûtah a puh a; Aizawl District Congress Committee leh PAC ṭhiatah puhin, thuneihna inpe chawpa Nomination Committee member ruatah a puh bakah, a ban chhan dangte a tarlang bawk.