Mizoramah ESI-a inziak lut 4,006 tling

Mizoram Employees’ State Insurance Society (MESIS) Governing Body chu June 8, Ningani tlaiah khan chief secretary Dr Renu Sharma kaihhruaiin CS conference hall-ah an ṭhukhawm. Mizoramah ESI scheme hnuaiah private establishment/unit 324 aṭangin thawktu mi 4,006 an inziak lut tawh tih tarlan a ni.

Mizorama Employees’ State Insurance (ESI) hmalakna leh hma­chhawpte sawihonaa tarlan danin, ESI scheme hi private hnuaia thawkte hamṭhatna atan sorkar laipuiin kum 1948-a a din a ni a; ESI-a inziak lutte leh an chhungte'n damlohna, nau pai leh nau neih chungchangah te, hna thawhna avanga ramtuileilo leh thihna tâwk thlengin hamṭhatna dawn theih a ni.

ESI-ah hian private firm eng pawh, thawktu mi 10 aia tlem lo awmnate chu inziak lut vek turin ESI Act chuan a phût a; inziak lutte chuan thla tin hlawh aṭangin hnathawktu (employee)-in 0.75% thawhin, a chhawrtu (employer)-in thawktu hlawh aṭanga 3.25% ESI-ah an chhùn luh a ngai. Ni khata Rs 137 hlawh tling lo chu a hlawh aṭanga pek tur 0.75% a pek a ngai lo thung.